QDB Qaraǵandy oblysynda mańyzdy jobany qarjylandyrady

ASTANA. QazAqparat - «Qazaqstannyń Damý Banki» AQ  «Jáırem taý-ken baıytý kombınaty» AQ-ǵa («Qaztsınk» JShS qurylymynda) Qaraǵandy oblysy Jáırem kentinde qýattylyǵy jylyna 5 mln tonna polımetall kenderin qaıta óńdeıtin (budan ári - Joba) jańa taý-ken baıytý kombınatyn (TBK) salý úshin nesıe jelisin ashty, dep habarlaıdy QazAqparat.

 QDB málimetine qaraǵanda, jobanyń jalpy quny 424 mln AQSh dollaryn quraıdy. QDB  taý-ken baıytý kombınatynyń birinshi kezeńin salý úshin 7 jylǵa deıingi merzimge ulttyq valıýtada 33 mlrd teńge kóleminde  qaryz usynady.  Tıisti nesıelik kelisimge  taraptar bıyldyń 20 qazanynda Astana qalasynda qol qoıdy.

«Búgin qarjylandyrý bastalǵany týraly jarııalaǵaly otyrǵan jobanyń Qazaqstannyń tutas taý-ken metallýrgııa keshenin damytýdaǵy mańyzy zor. Jáırem qorǵasyn, myrysh jáne barıttiń iri álemdik ken oryndarynyń qataryna jatady. Jáıremde jańa TBK qurylysy «Qaztsınk» kompanııasy úshin asa mańyzdy, sebebi ol elimizdiń shyǵysynda ornalasqan eski ken oryndary sarqylǵan soń qazaqstandyq resýrstyq bazany saqtaýǵa múmkindik beredi», - dedi QDB Basqarma tóraǵasy Bolat Jámishev.

Jobany iske asyrý eldiń óńdeý ónerkásibiniń damýyna edáýir úles qosatyn qazaqstandyq jetekshi metallýrgııa kásiporyndarynyń birine keleshekte daıyn ónim shyǵarý úshin metall kontsentratynyń ımportyna táýeldi bolmaýǵa múmkindik beredi.

Jáırem polımetall kenderiniń ken oryndarynda jańa TBK qurylysyn eki kezekpen júrgizý qarastyrylǵan. Birinshi kezek aıasynda taý-ken jumystary, separatsııa tsehynyń qurylysy júrgiziledi. TBK-nyń birinshi kezegin taýar ónimin, ıaǵnı aýyr fraktsııaly aldyn ala baıytylǵan ken shyǵarýmen 2018 jyldyń sońynda paıdalanýǵa berý josparlanǵan.

2019 jyldyń tórtinshi toqsanynda iske qosý josparlanǵan ekinshi kezek flotatsııalyq qaıta balqytýmen baıytý fabrıkasynyń basty korpýsynyń qurylysynan, qosalqy ınfraqurylym qurýdan turady. Jańa ken baıytý fabrıkasynyń qýattylyǵy 460 000-480 000 tonna qorǵasyn jáne myrysh flotatsııalyq kontsentrattaryn alýmen jylyna 5 mln tonna polımetall kenderin quraıdy. 2020 jyldan bastap shyǵarylatyn flotatsııalyq kontsentrattardaǵy metaldar ekvıvalenti 130 000 tonna myryshty, 60 000 tonna qorǵasyndy jáne 25  tonna kúmisti quraıdy.