QDB «Bogvı» agroónerkásiptik kásipornyna qatysty sotqa aryz daıyndaýda
ASTANA. 21 shilde. QazAqparat - 2010 jyldan beri Qazaqstan damý bankiniń aldynda nesıelik mindettemelerin oryndamaı kele jatqan «Bogvı» JShS Banktiń kelisiminsiz kólemi 13 mln. AQSh dollar quraıtyn qamtamasyz etilgen kepilzattyń zańsyz satylýyn júzege asyrǵan,
dep habarlady «Qazaqstan Damý banki» AQ Syrtqy baılanystar departamentinen.
Qazaqstannyń Damý Banki (QDB) «Bogvı» JShS iri ónim óndirýshige qatysty sot aryzyn joldamaq. Agroónerkásiptik kásiporyn 2007 jyldan beri QDB-niń qaryz alýshy kompanııasy.
Qazaqstannyń Damý Banki «Bogvı» JShS-niń astyq ótkizý eksporttyq operatsııalaryn, sondaı-aq, Aqmola jáne Soltústik Qazaqstan oblystarynda dándi daqyldardy óndirý boıynsha biriktirilgen agroónerkásiptik keshendi qurý boıynsha jobalaryn qarjylandyrǵan. Alaıda, 2010 jyldyń ekinshi toqsanynan bastap, atalmysh kásiporyn qoldanystaǵy qaryz sharttary boıynsha mindetterin oryndamaıdy. Uzaq kelissózder jáne qaryzgerdiń keńeıtilgen monıtorıngin júrgizý nátıjesinde, 2010 jyldyń qazan aıynda QDB qaryzdy qaıta qurylymdaý boıynsha sheshim qabyldaǵan. Ekijaqty kelisimge sáıkes, qaryzger sharttaǵy birqatar mindetterdi oryndaǵan jaǵdaıda, qaryzdyń tóleý merzimin uzartý jáne paıyzdyq mólsherlemesin tómendetý kózdelgen.
Atap aıtqanda, QDB kepilzatpen qamsyzdandyrý maqsatynda kásiporynnyń elevatory jáne astyq qabyldaý bólimderine taýar-materıaldyq qorlardyń monıtorıngin ótkizetin táýelsiz ınspektorlardyń enýin qamtamasyz etýdi talap etti. Tekserý barysynda kepilzattyq múlikti zańsyz ótkizý jáne ónim mólsheriniń kólemin asyryp kórsetý faktileri anyqtalǵan. Atap aıtqanda, saqtandyrý ınspektorlarynyń anyqtaýynsha, «Bogvı» JShS Banktiń kelisiminsiz 2010 jylǵy astyqtyń 62 myń tonna daqyl túrindegi jalpy baǵasy 13 mln AQSh dollar quraıtyn kepilzattyń satylýyn júzege asyrǵan. Sonymen qatar, «Bogvı» JShS-niń zańsyz áreketteri týraly Bankke habarlaǵan monıtorıng kompanııalarynyń qyzmetkerlerine qysym kórsetilgen.
Búginde QDB «Bogvı» JShS tarapynan mindetterdi júıeli oryndamaýyna baılanysty Bank zańdy quqyqtary men múddelerin qorǵaý maqsatynda sot jáne quqyq qorǵaý organdaryna kepilzattyq múlikti óndirip alý týraly aryz joldaýǵa májbúr ekenin habarlaıdy.
