QDB 25 mlrd. teńgege talshyqty-optıkalyq baılanys jelisin salý jobasyn qarjylandyrady
ASTANA. QazAqparat - «Qazaqstan Damý banki» AQ («Báıterek» Ulttyq basqarýshy holdıngi» AQ enshiles uıymy) «Transtelekom» AQ-nyń apparattyq-baǵdarlamalyq kesheniniń temirjol boıynda baılanys platformasyn salý boıynsha jobasyn qarjylandyra bastady, dep habarlaıdy banktiń baspasóz qyzmetinen.
«QDB ashqan jalpy kólemi 25 mlrd. teńgelik nesıe jelisi qazirgi baılanys jelilerin aıtarlyqtaı keńeıtýge, sondaı-aq málimetter taratý jyldamdyǵyn arttyrýǵa múmkindik beredi. Bólingen qarjy esebinen «Qazaqstan Temir Joly» UK» AQ-nyń qazirgi qajettilikterin eskere kele, 10 965 shaqyrym talshyqty-optıkalyq baılanys jelisi salynyp, jańǵyrtylady (6 416 km salynady, 4 549 km jańǵyrtylady)» delingen habarlamada.
Atalǵan joba aıasynda temirjol kóligi nysandary men barlyq jelilik bólimshelerin qosyp, avtomattandyrýdyń jáne aqparattandyrýdyń kúrdeli jáne kólemdi júıeleri engiziledi.
