Kcell jyl sońyna deıin Shymkentte 190 5G bazalyq stantsııasyn ornatýdy josparlap otyr
Búginde kompanııa lıtsenzııalyq mindettemelerin 20%-ǵa asyra oryndady, dep habarlaıdy Kazinform.
5G jelisin óristetýdiń jaı-kúıi, jetken meje jáne aldaǵy josparlardy talqylaý úshin baılanys salasynyń ókilderi Shymkentte kezdesý ótkizdi. \
Ózara múmkindikterdi salystyryp saralaý úshin tańdalǵan oryn kezdeısoq emes, Qazaqstanda besinshi býyn jelisiniń shymyldyǵy alǵash ret ońtústik óńirde ashylǵan edi.
Búginde elimizdiń úshinshi megapolısinde 5G jelisi jospardan artyǵymen oryndalyp keledi.
Kcell mobıldi baılanys operatory qazirdiń ózinde lıtsenzııalyq mindettemeler boıynsha josparlanǵan 94 bazalyq stantsııany asyra oryndap, 114-ke jetkizdi (mindettemeler 21,3%-ǵa artyq).
Sonymen qatar, óz bıznes-jospary aıasynda baılanys operatory bıyl Shymkentte taǵy 75 bazalyq stantsııa salýdy mejelegen.
Osyǵan sáıkes Kcell megapolıste barlyǵy 190-ǵa jýyq 5G bazalyq stantsııasyn paıdalanýǵa berýdi, sondaı-aq 170-ten astam bazalyq stantsııany jańǵyrtýdy kózdep otyr.
Zamanaýı jeli múmkindikteri men josparyn talqylaǵan telekom ókilderi qurylysty kózben kórip baǵalaý úshin, Shymkent shaharynyń eń bıik núkteleriniń birine, ıaǵnı eńseli ǵımarattyń shatyryna shyǵyp kórdi.
Qalany qus ushar bıiktikten baqylaǵan mamandardyń aıtýynsha, Kcell jaqyn arada Shymkenttiń negizgi aýdandaryn 5G baılanysymen neǵurlym keńirek qamtýdy josparlap otyr.
Odan bólek 5G jelisin páterge jáne keńsege kirgizip beretin «Kcell Auleti» jobasy bul kózdegen mejeni jaqyndata túspek.
Eki aıdan beri júzege asyp kele jatqan bul joba eń zamanaýı besinshi býyn jelisin páterge eshbir symsyz, qabyrǵalardy burǵylaýsyz, bir ǵana qurylǵynyń arqasynda kirgizip berýge qaýqarly.
«Qazir «Qazaqtelekom» tobyna kiretin eki uıaly baılanys kompanııalary Kcell jáne MTS 5G bazalyq stantsııalaryn merziminen buryn salýda jáne búginde respýblıka boıynsha operatorlar 1000-nan astam bazalyq stantsııalardy ornatyp úlgerdi. Mysaly, Shymkentte Kselldik áriptester demalyssyz jumys istegendikten, josparlaryn 20 paıyzdan asyra oryndady. Bul jerde qurylystyń merzimi men jyldamdyǵy operatorlardyń ózine ǵana emes, sonymen qatar qazaqstandyqtarǵa da baılanysty, sebebi bizde radıofobııaǵa baılanysty bazalyq stantsııalardy ornatýda kedergi keltirý faktileri jeterlik»- dep atap ótti «Qazaqtelekom» AQ basqarma tóraǵasy Qýanyshbek Esekeev.
Otyrysqa jınalǵan sala mamandarynyń aıtýynsha, bir ǵana Shymkenttiń ózinde bazalyq stantsııany ornatýǵa qarsy bolǵan turǵyndar 15-ten astam mekenjaı boıynsha qurylysqa ruqsatyn bermegen.
Bul baǵytta bılik tarapynan da qoldaý qajet, sebebi stantsııany ornatý qıyn emes, onyń ornyn belgileý, daıyndaý, barlyq qajetti jelilerdi qosý jáne tom-tom ruqsat qaǵazdaryn jınaý jumystary ýaqytty alady deıdi mamandar.
Kedergilerge qaramastan Kcell qazirdiń ózinde jospardy asyra oryndap kele jatqanyn naqty kórsetkishterimen dáleldedi jáne o basta jyl sońyna deıin josparlaǵan mejesine búginde jetip qalǵanyn kórsetti.
Qazir elimizdiń 15 qalasynda 400-den astam 5G bazalyq stantsııalaryn iske qosty.
«Besinshi býyn baılanysyn jetildirýmen qatar, biz respýblıkadaǵy jelilik ınfraqurylymdy únemi damytýdy jáne jańa bazalyq stantsııalardy jańǵyrtý jáne salý arqyly baılanys sapasyn arttyrýdy jalǵastyramyz. Tek sońǵy 3 jylda qazaqstandyqtardy, sonyń ishinde aýyl turǵyndaryn telekommýnıkatsııa qyzmetimen qamtamasyz etý úshin biz búkil el boıynsha 1000-nan astam bazalyq stantsııalardy saldyq. Al sońǵy eki jylda Kcell qalalar men aýyldardyń 1,5 mıllıonnan astam turǵyndaryn 3G jáne 4G tehnologııalaryn paıdalana otyryp, barlyq zamanaýı baılanys qyzmetterimen qamtamasyz etti», - dedi Ashat Ózbekov.
Bir aıta keterligi, jelini damytýdyń 2023-24 jyldarǵa arnalǵan baǵdarlamasy aıasynda Ksell el boıynsha 250-den astam aýyldyq eldi mekendi zamanaýı telekom qyzmetterge qosýdy josparlap otyr, onyń ishinde búginde 76 aýyldy qosyp úlgergen. Taǵy 60 bazalyq stantsııa qurylys júrgizý satysynda.
«Jergilikti atqarýshy organdarǵa belsendi kómekteri úshin alǵys aıtamyn jáne basqa oblystardaǵy ákimdikterge de bizben qoıan qoltyq jumys isteýge shaqyramyn. Óıtkeni, shyn máninde, bazalyq stantsııany ornatý qıyn emes, negizgi kedergiler qurylǵy ornatatyn dińgektiń ornyn bólý, ony turǵyzyp, elektr qýatymen qamtamasyz etý sııaqty sharýalar. Bul árıne eń aldymen jergilikti atqarýshy bıliktiń mindeti, biz óz tarapymyzdan olarǵa qolaıly oryndy tańdaý jáne elektr qýatymen qamtamasyz etý máselelerinde jan-jaqty saraptamalyq qoldaý kórsetýge daıynbyz», - dedi «Ksell» AQ bas tehnıkalyq dırektory Kırıll Strashenko.
Al Túrkistan oblysyna qaıta oralar bolsaq, Ksell oblys ákimdigimen aǵymdaǵy jáne aldaǵy jyldarǵa jelini jańǵyrtýdy kózdeıtin birlesken «jol kartasyn» ázirlegen jáne oblystyń 225 aýylynda kórsetiletin baılanys qyzmetteriniń sapasyn arttyrý jáne jyl sońyna deıin 120-ǵa jýyq bazalyq stansany, al kelesi jyly 100-den astam stantsııany jańartýdy josparlaýda.
Baılanys operatory kelesi jyldyń birinshi toqsanynda oblystaǵy týrıstik nysandar – Syrdarııa-Túrkistan memlekettik tabıǵı saıabaǵy men Arystanbab kesenesin júırik ınternetpen qamtýdy josparlap otyr.
