Kcell Solutions JShS-nyń burynǵy top-menedjeri sottaldy

NUR-SULTAN. QazAqparat – QR Qarjylyq monıtorıng agenttiginiń Almaty qalasy boıynsha aýmaqtyq departamenti «Kcell Solutions» JShS-niń burynǵy qarjy dırektoryna qatysty sotqa deıingi tergeýdi aıaqtady.

Atalǵan azamat jalǵan qarjylyq qujattar jasap, óz atyna zańsyz avans berý arqyly «Ksell» AQ qarajatyn asa iri kólemde jymqyrdy degen kúdik keltirilip otyr, dep habarlady QazAqparat QR Qarjylyq monıtorıng agenttigi baspasóz qyzmetiniń ókili Álibek Ábdilovke silteme jasap.

Tergeý barysynda kompanııanyń burynǵy qarjy dırektory 2018 jyldyń aqpanynan 2021 jyldyń sáýirine deıingi aralyqta 5 kompanııanyń esepshotyna aqsha aýdarý arqyly qarajat urlaǵan, sondaı-aq ózine jalpy somasy 467 mıllıonnan astam teńgeni quraıtyn avans bergeni anyqtaldy.

Osylaısha, ol «Ksell» AQ-na asa iri kólemde zııan keltirip, qylmystyq quqyq buzýshylyq jasaǵan.

Jedel-izdestirý sharalary barysynda kompanııanyń burynǵy qarjy dırektory urlanǵan aqshany Almatydaǵy býkmekerlik keńselerde bás tigip, jumsaǵany anyqtaldy.

Sot úkimimen azamat M.Shókeı Qazaqstan Respýblıkasy Qylmystyq kodeksiniń 189 baby 4-bóligi 2-tarmaǵy boıynsha kináli dep tanylyp, 7 jyl merzimge bas bostandyǵynan aıyrý jazasyna kesildi.

Sondaı-aq, ol 10 jyl merzimge qarjylyq jaýapkershilikpen baılanysty qyzmetterdi atqarý quqyǵynan aıyryldy.