Kcell mıkroqońyraý fýnktsııasyn 30 maýsymnan bastap óshiredi
ASTANA. KAZINFORM — 2026 jylǵy 30 maýsymnan bastap Kcell jáne activ abonentteri úshin «mıkroqońyraý» fýnktsııasy óshiriledi.
Bul servıs dástúrli mobıldi baılanys negizgi kommýnıkatsııa quraly bolǵan kezeńde iske qosylyp, qońyraý júzege aspaǵan jaǵdaıda da baılanysý áreketi týraly habarlaýǵa múmkindik beretin.
Alaıda sońǵy jyldary qarym-qatynas daǵdylary aıtarlyqtaı ózgerdi. Búginde abonentterdiń basym bóligi messendjerlerdi, daýystyq habarlamalardy jáne basqa da tsıfrlyq baılanys arnalaryn paıdalanady. Sonyń nátıjesinde mundaı qyzmetterge degen qajettilik edáýir tómendedi.
Osyǵan baılanysty kompanııa «mıkroqońyraý» fýnktsııasyn qoldaýdy toqtatý týraly sheshim qabyldady.
— 2026 jylǵy 30 maýsymǵa deıin servıs qalypty rejımde jumysyn jalǵastyrady, al osy kúnnen bastap Kcell jáne activ abonentteriniń barlyǵy úshin tolyq óshiriledi.
Biz paıdalanýshylardyń zamanaýı qajettilikterine saı keletin tsıfrlyq servıster men sheshimderdi damytýdy jalǵastyramyz jáne baılanysýdy odan ári yńǵaıly etýge umtylamyz, — delingen habarlamada.
