QBTÝ stýdentteri halyqaralyq baǵdarlamalaý jarysynda jeńimpaz atandy
ALMATY. 27 qarasha. QazAqparat /Erbol Turymbetov/ - Almatydaǵy Qazaq-Brıtan tehnıkalyq ýnıversıtetiniń stýdentteri baǵdarlamalaýdan Soltústik-shyǵys eýropa aımaǵy (NEERC) stýdenttik komandalary (ACM ICPC) arasynda ótken halyqaralyq jarysta jeńiske jetti.
Bul týraly ýnıversıtettiń baspasóz qyzmeti habarlady.
Jarystyń jartylaı fınaly 24 qarasha kúni bir ýaqytta TMD elderiniń Sankt-Peterbýrg, Tashkent, Tbılısı jáne Barnaýl qalalarynda ótken. Tartysty ótken jarysqa Ýkraına men Moldovadan basqa post-keńestik keńistik elderiniń 200-den asa stýdenttik toptary qatysqan.
Tashkentte bolǵan básekede komandalar ACM ICPC aqtyq synymen birge, Ortalyq Azııa chempıondyǵyna talasqan. Qazaqstan atynan bul synda ál-Farabı atyndaǵy QazUÝ, Q. Sátbaev atyndaǵy QazUTÝ, QBTÝ, Halyqaralyq aqparattyq tehnologııalar ýnıversıteti jáne basqa da JOO stýdentteri qatysqan. Saıys qorytyndysynda alǵashqy 6 oryn ishinde 5 qazaqstandyq jáne Tashkent MMÝ komandalary bolǵan.
1-3-oryndardy QBTÝ komandalary alsa, 4-oryndy ál-Farabı atyndaǵy QazUÝ stýdentteri ıelengen. Al osy tórttikten 2011 jyldyń aqpanynda Mysyrda ótetin aqtyq synǵa Ortalyq Azııa aımaǵynyń jeńimpazy - «QBTÝ-1» stýdenttik komandasy shaqyryldy. Komanda quramy - aqparattyq tehnologııalar fakýltetiniń 3-kýrs stýdentteri Esenamanov Arman, Baıjikenov Baqytjan jáne Qanapın Esenjar. Endi olar aldaǵy jarysta Ortalyq Azııa aımaǵyndaǵy osy sala mamandarynyń deńgeıin kórsetetin bolady.
