QBTÝ menshik ıesi týraly másele Joǵarǵy sotta qaralyp jatyr
ALMATY. KAZINFORM — Kazinform agenttigi Ǵylym jáne joǵary bilim mınıstrligi men Qaıtarylǵan aktıvterdi basqarý kompanııasyna QBTÝ-dyń qazirgi menshik ıesi týraly saýal joldady.
Bıyl naýryz aıynda QBTÝ memleketke qalaı qaıtarylǵany belgili boldy.
Alaıda keıinirek agenttik saýalyna jaýap bergen Qaıtarylǵan aktıvterdi basqarý kompanııasy bul másele áli tolyq sheshilmegenin habarlady.
Máseleni naqtylaý úshin qaıta joldanǵan saýalǵa Ǵylym jáne joǵary bilim mınıstrligi Qazaqstan-Brıtan tehnıkalyq ýnıversıteti vedomstvolyq baǵynysty uıymdar tizbesine kirmeıtinin jáne onyń quqyqtyq márbesine qatysty suraqqa jaýap bere almaıtynyn málimdedi.
Jalpy vedomstvo málimetinshe, qazirgi ýaqytta QBTÝ-da bakalavrıatta — 7956 stýdent, magıstartýrada — 887 stýdent, doktorantýrada — 120 stýdent bilim alyp jatyr. 2024-2025 oqý jylynda bitirýshiler sany: bakalavrıatta — 975 adam, magıstratýrada — 432 adam, doktorantýra — 32 adam.
Al «Qaıtarylǵan aktıvterdi basqarý kompanııasy» JShS-nyń jaýabyna sáıkes, ýnıversıtettiń menshik ıesi týraly másele Joǵarǵy sotta qaralyp jatyr.
— Qazaqstan-Brıtan tehnıkalyq ýnıversıtetiniń bolashaq taǵdyryna qatysty másele áli de ashyq kúıinde qalyp otyr. Burynǵy aktsıonerler bastamashy bolǵan azamattyq is qazirgi ýaqytta Joǵarǵy sotta qaralyp jatyr. Daýǵa qatysty túpkilikti sheshim elimizdiń joǵarǵy sot organy qaýly shyǵarǵannan keıin qabyldanady, — delingen jaýapta.
Eske salaıyq, buǵan deıin Ǵylym jáne joǵary bilim mınıstri Saıasat Nurbek memleketke qaıtarylyp jatqan Qazaqstan-Brıtan tehnıkalyq ýnıversıtetiniń keleshegi týraly pikir bildirdi.