KBK burynǵy tóraǵasy S.Baımaǵanbetov shartty túrde merziminen buryn bostandyqqa shyqty
QARAǴANDY. QazAqparat - Sybaılas jemqorlyqqa qatysty sottalǵan Kedendik baqylaý komıtetiniń burynǵy tóraǵasy Serik Baımaǵanbetov shartty túrde merziminen buryn bostandyqqa shyqty, dep habarlady Qaraǵandy qalasy Qazybek bı aýdandyq sotynyń baspasóz qyzmetinen.
«2015 jyldyń 4 aqpanynda Qazybek bı aýdandyq soty S.Baımaǵanbetovqa qatysty qaýly shyǵardy. Ol jazasyn ótemegen 1 jyl, 11 aı jáne 29 kúnnen buryn shartty túrde merziminen buryn bosatyldy. Sot zań talaptaryna sáıkes, belgili mindetterdi júktegen: bosatylý kúninen bastap, 5 jumys kúniniń ishinde ishki ister organdarynda tirkeýden ótý, tártibi boıynsha esep berý úshin aı saıyn probatsııa qyzmetine kelý, ókiletti memlekettik organǵa eskertýsiz turǵylyqty meken jaıyn aýystyrmaý jáne t.b», - dedi aýdandyq sottyń baspasóz hatshysy Álııa Josheva.
Qaýlyda QR Prezıdentiniń 2014 jylǵy 9 qyrkúıektegi Jarlyǵymen S.Baımaǵanbetovke raqymshylyq jasalyp, qylmystyq jazanyń merzimi 5 jylǵa deıin qysqartylǵany kórsetildi.
«Ol (Baımaǵanbetov) jazasynyń 3 jylǵa jýyq merzimin, ıaǵnı merziminiń jartysynan kóbin ótedi, tártip buzǵan joq», - dep túsindirdi Á.Josheva.
Sottalýshy 2015 jylǵy 26 qańtarda jazany jeńildetýdi surap, ótinish jazǵan. Atap aıtqanda, S.Baımaǵanbetov ótelmegen merzimdi bas bostandyǵynan aıyrýdyń ár 4 kúni úshin 1 aılyq eseptik kórsetkish (AEK) esebindegi aıyppulǵa aýystyrýdy surady. Qalǵan 2 jylǵa jýyq ýaqytty eseptegende, aıyppul 360 myń teńgeden asady.
S.Baımaǵanbetov bostandyqqa 20 aqpan kúni shyqty.
