«Qazynaly aımaq densaýlyǵyna qaýip qaıdan keldi?» - respýblıkalyq basylymdarǵa sholý
***
«Egemen Qazaqstan» basylymy búgingi sanynda «Aýyr qylmys azaıǵanmen, jemqorlyqtyń jyly boldy» atty maqala basty.
Basylymnyń jazýynsha, Qazaqstan Respýblıkasy Joǵarǵy Sotynyń tóraǵasy Bektas Beknazarovtyń qatysýymen ótken májiliste Qostanaı oblystyq sotynyń tóraǵasy Baǵlan Maqulbekov jyl boıy atqarylǵan jumys jaıly baıandama jasady. Qostanaı oblysynyń sottar óndirisi ótken jyly barlyǵy 69 470 is pen materıaldardy, sonyń ishinde 4 114 qylmystyq, 35 348 azamattyq, 20 116 ákimshilik is qaraǵan. Qylmys byltyrǵymen salystyrǵanda 997 iske azaıǵan. Jalpy oblys boıynsha qylmystyq isterdiń tómendeý úderisi baıqalady. Onyń esesine esepti jylda qostanaılyq bıik laýazymdaǵy jemqor sheneýnikterdiń biraz shýlatqany oqyrmandardyń da esinde bolar. Memleket qazynasyna suǵanaqtyq jasaǵan sybaılas jemqorlyq qylmystyń sany kóbeıgen. Oblystyq sottar qaraǵan jemqorlyq týraly 45 istiń ótken jyldan beseýi artyq.
Ońtústiktiń qysy qoıannyń quıryǵyndaı sholaq. Áıtse de sonyń ózi qysqa daıyndyǵy nashar qalalar men aýdandardyń ápter-tápterin shyǵaryp jiberedi. Aqpannyń úshinen tórtine qaraǵan juldyzynda Kentaý qalasyndaǵy JEO-5-te apat bolyp, jylý júıeleri isten shyqty. "Qyrsyqqanda qymyran irıdi" degendeı, ońtústikte aıaz da kárine minip turǵan. Qarataýdyń eteginde otyrǵan shaǵyn qalada sol kúnderi on bes-jıyrma gradýs aıaz bolsa, túnde otyzǵa deıin jetken. Búkil qala betine qarap otyrǵan jalǵyz jylý elektr stansasy isten shyqqan soń, turǵyndar túzde de, úıde de súıek qarıtyn aıazben betpe-bet qaldy.Bul másele jóninde «Egemen Qazaqstan» basylymynyń búgingi sanyndaǵy «Kentaý aıaz qursaýynda» atty maqaladan oqyńyzdar.
***
«Alash aınasy» basylymynyń jazýynsha, bylaıǵy el asta-tók baılyqtyń ortasy dep biletin Atyraý halqy «basty baılyqtaryn» joǵaltyp jatyr. Úshtegi uly qaterli isikke shaldyǵyp, boıjetken qyzynyń ókpesin qurt aýrýy tesip tastasa, eldiń endigi úmiti ne?. Basy aýyra qalsa da «ekologııanyń kesiri» degen jalaqy jaýapty aldyna tartýdy ádetine aınaldyrǵan atyraýlyqtar áıtse de týǵan jerlerin tastaı qashýdy oılaryna da almaıdy. Qazynadaǵy kóp qarjy túptiń túbinde qara halyqtyń qamyna jaratylaryna olar senedi de. Biraq urpaǵynyń deni saý bop óserine degen senim az. Nege? Bul másele týraly «Alasha aınasy» basylymynyń búgingi sanyndaǵy «Qazynaly aımaq densaýlyǵyna qaýip qaıdan keldi?» atty maqaladan egjeı-tegjeıli bilýge bolady.
Sondaı-aq osy basylymnyń jazýynsha, qyrǵyzdar men tájikterdiń arasynan shı shyqty. Jańa jylǵa bir-eki kún qalǵanda, jeltoqsannyń 28-i kúni qyrǵyzstannyń Batken oblysyna qarasty Andarakt aýylynda qyrǵyzdar men tájikterdiń jappaı qaqtyǵystary oryn aldy. Mektep oqýshylarynyń arasyndaǵy aqshaǵa talasýdan týyndaǵan qarapaıym tóbelestiń arty eki jaqtan júzdegen adamnyń qatysýymen bolǵan jappaı tártipsizdikterge ulasty. Osy oqıǵa barysynda birneshe dúken, úı jáne avtokólikter órtke oranǵan. Qyrǵyzstanda bolǵan bul oqıǵalar «Alash aınasy» basylymynyń búgingi sanynda «Qyrǵyzstandaǵy tájik máselesi ýshyǵyp barady» atty taqyryppen basylǵan jáne onda osy oqıǵaǵa jan-jaqty saraptama jasalady.
***
Elordada Qazaqstan Respýblıkasy Prezıdenti Ákimshiligi basshysynyń orynbasary Talǵat Donaqovtyń tóraǵalyǵymen Joǵary sot keńesiniń májilisi ótti. Májilis barysynda Memleket basshysynyń Joǵary sot keńesiniń aldyna qoıǵan jáne Elbasynyń Joldaýynan týyndaıtyn mindetterdi júzege asyrý máseleleri qaraldy. Osyǵan qaraı keńestiń jumys josparyna birshama ózgerister engizildi. Sonymen qatar onda Sottardyń respýblıkalyq tártiptik-biliktilik alqasy men Sot alqasynyń sondaı-aq Sýdıalar etıkasy jónindegi komıssııanyń 2011 jyly atqarǵan isteri ortaǵa salyndy. Buǵan qosa májiliske qatysýshylar Joǵarǵy sottyń aýdandyq jáne olarǵa teńestirilgen sottardyń shtat quramyn ońtaılandyrý jónindegi usynystary tyńdaldy. Bul máseleler «Kazahstanskaıa pravda» basylymynyń búgingi sanynda «Kadrovye voprosy sýdebnoı sıstemy» atty taqyryppen basyldy.
