«Qazynaǵa qol salǵan qyz Arab Ámirliginde demalyp júr» - respýblıkalyq basylymdarǵa sholý
***
«Astana qalasyndaǵy «Evrokopter» - «Qazaqstan-ınjınırıng» JShS-niń bazasynda táýelsiz Qazaqstannyń tuńǵysh tól tikushaǵy «Evrokopter» qurastyryla bastady», - dep jazady «Egemen Qazaqstan» gazeti «Tól tikushaǵymyz bıiktikterdi baǵyndyrýda» degen taqyryptaǵy maqalasynda. Bul tikushaqtar negizinen Qarýly Kúshterdiń basshylyq jáne jeke quramdaryn, syrqattanǵan nemese jaraqattanǵan jaýyngerlerdi tasýǵa, sonymen birge tótenshe jaǵdaılardyń saldarlaryn joıýǵa arnalǵan. Jaqynda osyndaı eki tikushaq qurastyrý tsehynan shyǵyp, elimizdiń Áýe qorǵanys kúshterine qarasty №19132 áskerı bólimine tapsyryldy. Tikushaqtyń taktıkalyq-tehnıkalyq sıpattamalaryna keletin bolsaq, onyń ushqan kezdegi kóteretin salmaǵy 3585 keli. Bir mezgilde bortyna barlyq qarý-jaraǵyn asynǵan 8 spetsnazdy qabyldaı alady. Tikushaqtyń kreıserlik jyldamdyǵy saǵatyna 230 shaqyrym. Ushý uzaqtyǵy - 3 saǵat 20 mınýt.
«Egemen Qazaqstan» gazetiniń jazýynsha, keshe Aqtaýda 2011 jyldyń 16-17 jeltoqsan kúnderi Jańaózen qalasynda oryn alǵan oqıǵalarǵa baılanysty ótken aptada bastalǵan sot otyrysy odan ári jalǵasty. Sot otyrysy belgilengen ýaqytta jábirlenýshilerden jaýap alýmen bastaldy. Áýeli Jańaózen qalasynda ornalasqan ekinshi deńgeıli bankter, jaýapkershiligi shekteýli seriktestikter, oblystyq jyljymaıtyn múlik ortalyǵynyń qalalyq fılıalynyń ókilderi, sondaı-aq jeke menshik ıeleri, kásipkerler suraldy. Odan keıin quqyq qorǵaý oryndarynyń ókilderi oqıǵaǵa baılanysty bolǵan jaǵdaılardy aıtyp, qorǵaýshylardyń, memlekettik aıyptaýshylardyń, sottaýshylardyń saýaldaryna jaýap berdi. Tolyǵyraq basylymdaǵy «Sot otyrysy jalǵasýda» degen taqyryptan bile alasyzdar.
***
Qazaqstan Statıstıka agenttiginiń burynǵy tóraıymy A.Meshimbaevanyń qaıda qashyp tyǵylǵandyǵy aqyry anyqtaldy: «2009 jylǵy jalpy ulttyq halyq sanaǵy kezinde el qazynasynan júzdegen mıllıon qarajatty jymqyrdy» dep aıyptalǵan Anar hanym qumǵa baryp, boı tasalaǵan eken. Biraq eks-tóraıymnyń tańdaýy qazaq jerindegi shaǵyl qumdy qyrqalarǵa emes, arabtar elindegi qumdy teńiz jaǵalaýyna túsipti. Eger qashqyn hanym basqa el asyp ketpese, jaqyn ýaqytta onyń qolyna kisen salynýy yqtımal. Óıtkeni keshe, Nurlan Nyǵmatýlınniń tóraǵalyǵymen ótken Májilistiń jalpy otyrysynda qalaýlylar «Qazaqstan men BAÁ arasyndaǵy Qylmyskerlerdi ustap berý týraly kelisimdi» quptady. Bul jaıynda egjeı-tegjeıli bilgińiz kelse «Aıqyn» gazetindegi «Qazynaǵa qol salǵan qyz Arab Ámirliginde demalyp júr» degen taqyrypqa nazar salyńyz.
***
«Alash aınasy» gazetiniń turaqty «Dat!» aıdarynda pedagogıka ǵylymdarynyń doktory, professor Gúlnas Ahmetovamen aradaǵy suhbat «Bilim sapasyn arttyrýdyń kepilin tek qarajattan ǵana emes, muǵalimniń rýhanı jan dúnıesinen de izdeý kerek» degen taqyryppen berilgen. Basylym tilshisiniń barlyq saýaldaryna tuşymdy jaýap bergen ǵalym: «Qazir keıbir mamandar: «JOO-lardy bitirgender bes jyl mamandyǵy boıynsha jumys istemese, dıplomnyń kúshin joıý kerek», - dep másele kóterip júr. Men bul pikirmen kelispeımin. Óıtkeni bul óte qatty aıtylǵan sekildi. Bundaı pikirge kelý úshin jas mamannyń ne sebepti óz mamandyǵy boıynsha jumys istemeı otyrǵanyn jan-jaqty anyqtaǵan jón. Ultymyzdyń sanyn arttyryp otyrǵan jas kelinshekke, sóz joq, mundaı zań júrmeıdi», - deıdi.
***
«Kazahstanskaıa pravda» gazetiniń jazýynsha, QR Syrtqy ister mınıstrligi keshe shet elderdiń Iranǵa qarsy yqtımal soǵys maqsattaryna Qazaqstan óziniń aýmaǵyn berýge kelisimi jaıly kez kelgen aqparat shyndyqqa janaspaıtyndyǵyn málimdegen. «Shet elderdiń úshinshi elderge qarsy soǵys maqsattaryna Qazaqstannyń aýmaqtary men áýe keńistigin paıdalanatyny týraly jaýapkershiliksiz málimdemeleri men aqparat quraldarynda paıda bolǵan sybystyń eshqandaı negizi joq. Halyqaralyq qarym-qatynastyń jaýapty sýbektisi jáne ıadrolyq qarýdan bas tartý salasynda kóshbasshy retinde tanylyp otyrǵan Qazaqstan qazir jáne árqashanda ırandyq ıadrolyq baǵdarlama tóńiregindegi jaǵdaıdy dıplomatııalyq jolmen jáne beıbit retteýdi dáıekti jaqtaıdy», - delingen málimdemede.
