Qazynadan qarjy jymqyrǵan basshylar birneshe jylǵa sottaldy
ÓSKEMEN. QazAqparat - 2017 jyly Shyǵys Qazaqstan oblysy boıynsha Memlekettik kirister departmentiniń ekonomıkalyq tergeý qyzmeti memlekettik satyp alýdy júzege asyrý barysynda jáne jáne kvazımemlekettik sektorda bıýdjet qarjysyn jymqyrǵan 42 qylmystyq isti áshkereledi, dep qabarlaıdy «QazAqparat» tilshisi atalmysh basqarmanyń baspasóz qyzmetine silteme jasap.
Anyqtalǵan shyǵyn kólemi 564 mln teńgeni quraǵan. 163,5 mln teńge erikti túrde qaıtarylsa, 279,5 mln teńge buǵattaldy.
Qarjynyń basym bóligi elektrondyq saýda men memlekettik satyp alý jumystary arqyly jáne memlekettik baǵdarlamalarǵa bólingen qarjydan jymqyrylǵan. 25 faktiniń 18-i «Qol jetimdi baspana -2020», «Balapan», «Jaılaý» sııaqty birneshe baǵdarlamalar arqyly jasalǵan.
ShQO, Jarma aýdanynyń, Solnechnyı kentindegi qazandyq qurylysyna bólingen qarjydan 310,7 mln teńge jymqyrǵan «SMP Almaty» JShS dırektoryna qatysty qozǵalǵan qylmystyq is aıaqtaldy. Tergeý barysynda V.Ahmadıev zań organdarynan boı tasalap, Belarýs memleketine qashyp ketken. Ol keıin QR aýmaǵyna ekstradıtsııalandy. Sot sheshimimen qylmysker úsh jarym jylǵa bas bostandyǵynan aıyryldy.
«Shyńǵystaý nesıe» JShS basshysy E. Arnaǵa qatysty da qylmystyq is máresine jetti. Nesıege bólingen qarjydan 27 mln teńge urlaǵan jemqordy sot bes jylǵa bas bostandyǵynan aıyrdy. Dál osyndaı qylmys jasap 24 mln teńgeni qoldy qylǵan «Sapa» nesıelik seriktestiginiń basshysy G.Ospanova 5 jyl temir tordyń arǵy jaǵynda otyratyn boldy.
Bıýdjettiń qarjysyn alıaqtyq joldarmen jymqyryp, jalǵan qujattar arqyly áleýmettik «jumys oryndaryn» ashqan jeke kásipker Chernenko S. 9,6 mln teńgeni óz qaltasyna basqan. Sottyń sheshimimen ol 5 jylǵa bas bostandyǵynan aıyryldy.
