Qazylǵan orǵa túsken 200-ge tarta janýar qutqaryldy
NUR-SULTAN. QazAqparat - Túrkistan oblysyna ǵylymı ekspedıtsııaǵa shyqqan ǵalymdar qazylǵan orǵa túsip ketken janýarlar men baýyrymen jorǵalaǵyshtardy, qosmekendilerdi qutqardy, dep habarlaıdy QazAqparat tilshisi Qazaqstan bıoártúrlilikti saqtaý qaýymdastyǵynyń (QBSQ) feısbýktegi paraqshasyna silteme jasap.
Ótken aıda Túrkistan oblysyna jasalǵan ǵylymı ekspedıtsııa barysynda ǵalymdar toby jańadan qazylǵan eki metrlik shuńqyrǵa túsip qalǵan júzdegen baýyrymen jorǵalaǵysh pen qosmekendilerdi tapqan. Ondaǵan shaqyrymǵa sozylǵan or fermerlik sharýashylyqtardyń birine mal kirip ketpeý úshin qazylǵan bolýy kerek.
Qazylǵan ordan ortaazııalyq tasbaqalar, saryjylandar (Qazaqstannyń Qyzyl kitabyna engizilgen), shyǵys jylandary, jasyl baqalar men túrli-tústi kesirtkeler tabylǵan. Janýarlar men jándikterdiń 10 paıyzy ólgen. Eki metrlik orǵa túsip ketken olar ashtan qyrylyp qalǵan. Ekspedıtsııaǵa qatysýshylar janýarlar men jándikterdiń bárin syrtqy shyǵaryp, ordan alys aýmaqqa jiberdi.
«Tabylǵan janýarlardyń kóbi ortaazııalyq tasbaqalar (174). Saryjylandardyń da 91-i qutqaryldy. Bulardy biz qutqaryp alǵanymyzben, másele sheshilgen joq - kúni erteń qaıtadan túsip ketkender qutqaryla almaı qalatyny anyq», - dedi ekspedıtsııaǵa qatysýshylardyń biri, QBSQ qyzmetkeri ári «Ortalyq Azııa shólderi boıynsha bastamalar» jobasynyń úılestirýshisi Vladımır Terentev.
Atalǵan jaǵdaı - adamnyń sharýasyna bola oılastyrylmaǵan jumys jabaıy janýarlardyń ómirine qaýip tóndiretinin anyq kórsetip otyr. Bolǵan oqıǵanyń bári QR AShM Orman sharýashylyǵy jáne janýarlar dúnıesi komıtetine joldanǵan.
