«Qazylardyń qıturqy áreketi Maııa Manezany bas júldeden aıyrdy» - respýblıkalyq basylymdarǵa sholý
***
Keshe Astanadaǵy «Redıson SAS» qonaq úıinde Qazaqstan Damý bankiniń qurylǵanyna 10 jyl tolýyna oraı uıymdastyrylǵan «Ekonomıkany jańǵyrtý maqsatynda ınvestıtsııalardy yntalandyrý: jańa múmkindikter» atty halyqaralyq konferentsııa bolyp ótti. Halyqaralyq konferentsııa jumysyn Qazaqstan Úkimetiniń basshysy Kárim Másimov ashyp, kirispe sóz sóıledi. Osyǵan oraı «Egemen Qazaqstan» gazetinde «Qazaqstannyń qarjy salasyndaǵy «muzjarǵyshy» degen taqyryppen maqala jaryq kórdi. Basylymnyń atap ótýinshe, Úkimet basshysy Kárim Másimov óz sózinde búgin tańerteń «Standart&Poor's» halyqaralyq agenttiginiń Qazaqstan Damý bankiniń nesıelik reıtıngin kótergendigin atap ótti. Ol sonymen birge banktiń elimizdiń ekonomıkasyn damytýdaǵy ólsheýsiz jumysyna toqtala kelip, bul qarjylyq ınstıtýttyń aldaǵy ýaqytta da osy qarqynnan taımaı eńbek ete beretinine senim bildirdi.
«Keshe Memleket basshysy Nursultan Nazarbaev Astana qalasynyń ákimi Imanǵalı Tasmaǵambetovti qabyldady», - dep jazady «Egemen Qazaqstan» gazeti. Basylymnyń atap ótýinshe, I.Tasmaǵambetov Prezıdentti elordanyń 2011 jylǵa arnalǵan áleýmettik-ekonomıkalyq damýynyń qorytyndylary, aldaǵy ýaqytta qaladaǵy jańa nysandardy paıdalanýǵa berý, sondaı-aq Qazaqstan Respýblıkasy Táýelsizdiginiń 20 jyldyǵyn merekeleýge daıarlyq barysy týraly habardar etti. Sonymen qatar qala ákimi Memleket basshysyna elordanyń jylý maýsymyna tolyq daıyndyǵy týraly baıandady.
***
Aýyr atletıkadan Parıjde ótip jatqa álem chempıonaty bul kúnderi bel ortaǵa jetti. buǵan deıingi nátıjelerge zer salsaq, bas júldeniń denin Qytaı quramasy ıelendi. Sarapqa salynǵan alty altynnyń tórteýi solardyń enshisinde. Taǵy eki altyn Belarýs pen Qazaqstan ziltemirshilerine buıyrdy. Eýropa tórinde ótip jatqan baıraqty báseke jaıynda «Aıqyn» gazetiniń búgingi sanyndaǵy «Qazylardyń qıturqy áreketi Maııa Manezany bas júldeden aıyrdy» degen taqyryptaǵy maqalada keńinen baıandalǵan.
«Bas prokýratýranyń resmı ókili Nurdáýlet Súıindikov Qazaqstannyń kúsh qurylymdary lańkestik, adam óltirý, bala urlaý syndy jalǵan aqparat taratqan kez kelgen azamatty quqyqtyq jaýapkershilikke tartyp, tıisinshe jazalaıtynyn jarııalady», - dep jazady «Aıqyn» gazeti beısenbilik sanyndaǵy «Arandatýǵa boı aldyrmaıyq» degen taqyryptaǵy maqalasynda. «Osyǵan baılanysty azamattarymyzdy qyraǵylyq tanytyp, úreıge jáne mundaı arandatýlarǵa boı aldyrmaýǵa, onyń ishinde óz týystary men jaqyndaryn radıkaldy qurylymdar qataryna ilesýinen saqtaýǵa shaqyramyz», - depti resmı ókil.
***
Ulttyq panteon ashý máselesiniń kóterilgenine de biraz bolǵanyn jurt biledi. Ult qaıratkeri Smaǵul Sádýaqasulynyń súıegi elge ákelingende dál osy panteon máselesiniń ózektiligi onan saıyn tereńdegen. Keıinnen jurt arasynda astanadan 20 shaqyrym jerdegi «Qabanbaı batyr zıraty» retinde atalyp júrgen beıit-tóbe panteonǵa aınalatyny týraly áńgime órbigen-di. Bul rasqa aınalatyn sekildi. Bul jaıynda egjeı-tegjeıli bilgińiz kelse, «Alash aınasy» gazetiniń búgingi sanyndaǵy «Qabanbaı batyr jatqan jer» ulttyq qabirstanǵa aınalady» degen taqyryptaǵy maqalaǵa zer salyńyz.
Osy basylymnyń turaqty «Dat!» aıdarynda Abaı atyndaǵy Qazaq ulttyq pedagogıkalyq ýnıversıtetiniń proektory, fılosofııa ǵylymynyń doktory, professor Aqtolqyn Qulsarıevamen aradaǵy suhbat «Bir mádenıet ekinshisinen artyq ta emes, kem de emes» degen taqyryppen berilgen. Basylym tilshisiniń barlyq saýaldaryna tuşymdy jaýap bergen ǵalym: «Ǵalamat ǵalamtordyń, keremet kompıýterlik baǵdarlamalardyń bar múmkinshiligin paıdalana bilýge kelgende, bir ókinishtisi, elimizdiń aqparattaný deńgeıiniń, jalpy alǵanda, kenjeleýiniń zardaby ma, ǵalamtorlyq baılanys baǵasynyń qymbatshylyǵy ma, áıteýir, osy turǵysynan biraz kemshin tustar tabylyp jatyr», - deıdi.
«Kazahstanskaıa pravda» gazetiniń jazýynsha, QR Prezıdenti Nursultan Nazarbaev Premer-Mınıstrdiń birinshi orynbasary Ómirzaq Shókeev pen Aýyl sharýashylyǵy mınıstri Asyljan Mamytbekovti qabyldady. «Kezdesý barysynda Memleket basshysyna Qazaqstannyń agroónerkásip kesheniniń 2011 jylǵa arnalǵan qyzmetiniń nátıjeleri, jıyn-terin naýqanynyń qorytyndysy, sondaı-aq agroónerkásip kesheni qyzmetkerleriniń respýblıkalyq forýmyna daıarlyq barysy týraly baıandaldy», - dep jazady basylym.
