Qazyǵurttyq qarııalar Ózbekstanǵa saparlap qaıtty
QAZYǴURT. QazAqparat – Túrkistan oblysy Qazyǵurt aýdanynda Halyqaralyq qarttar kúni qarsańynda qarııalarǵa erekshe tartý jasaldy. Bir top zeınetkerler Ózbekstanǵa saparlap, tarıhı nysandardy tamashalap qaıtty, dep habarlaıdy QazAqparat tilshisi.
Qazyǵurt aýdan ákimshiligi uıymdastyrǵan saıahatqa aýdannan 45- ke jýyq el aǵalary men aq jaýlyqty analar bardy. Olar Ózbekstan respýblıkasynyń Samarqan shaharyna saparlap, shyǵystyń jaýhary atanǵan ári eń kórikti oryndardyń biri Regıstan qalashyǵynda boldy.
Aıta keteıik, Samarqan - tula boıy tarıh pen taǵylymǵa tunǵan qala. Bul shahar Pamır-Altaı taýlarynyń baýraıyndaǵy Ózbekstannyń ońtústik-shyǵysyndaǵy Zarafshan ózeniniń janynda ornalasqan. Saıahatshylar aldymen turǵyndarynyń sany men kólemi jóninen Ózbekstandaǵy ekinshi úlken qala sanalatyn Samarqandtaǵy Ulyqbek, Sheri-Dar, Tillá Qarı medreselerin aralap kórdi. Bul medreseniń úsheýi de ár túrli mezgilde turǵyzylyp, óskeleń urpaqqa ata-baba murasy retinde jetkizilgen sáýletti ǵımarattar sanalady.
Sonymen qatar kórshi eldegi ózge de tarıhı oryndardy tamashalap, ejelgi shyǵys bazaryna baryp qaıtty.
Óz kezeginde zeınet jasyna shyǵyp, el men jer kórip qaıtqan qarııalar Qazyǵurt aýdanynyń ákimdigine jáne osy saparǵa demeýshilik jasaǵan azamattarǵa alǵysyn jaýdyrdy.