Qazyǵurttyq 618 azamat shaǵyn nesıe men qaıtarymsyz qarajat aldy - Túrkistan oblysy
QAZYǴURT. QazAqparat - Sońǵy jyldary Túrkistan oblysy, Qazyǵurt aýdanynda shaǵyn jáne orta kásipkerlik nysandarynyń sany artyp keledi, dep habarlaıdy QazAqparat Óńirlik kommýnıkatsııalar qyzmetine silteme jasap.
Bul rette kásip ashsam deýshilerge 6 paıyzdyq nesıe men qaıtarymsyz beriletin qarjynyń kómegi orasan bolyp otyr. Aıtalyq, byltyrǵy jyly aýdanda 264 azamat «Aýyl sharýashylyǵyn qoldaý qory» jáne «Ońtústik» áleýmettik kásipkerlik korporatsııasy arqyly jalpy somasy 876 mln 325 myń teńge nesıe alyp, kásip ashqan. Onyń ishinde 19-y múmkindigi shekteýli azamattar, 69-y jastar, qalǵandary kópbalaly otbasylar sanalady.
Máselen, úshinshi toptaǵy múgedek Asylbek Aınabekov óz úıin kepildikke qoıyp, byltyrǵy jyldyń shilde aıynda 2 mln 800 teńge nesıe alǵan. Oǵan 9 jylqy satyp alyp, búginde qorasynda kútip-baptaýda.
«Kez kelgen kásipti ashý úshin mol qarjy kerek. Áıtpese, oıyńdaǵy bıznes-jospardy júzege asyrý qıyn. Byltyrǵy jyly úıimdi kepildikke qoıyp, mol qarjyǵa 9 bas jylqy satyp aldym. Onyń jartysy etti, jartysy sútti baǵytta baǵylýda. Aldaǵy ýaqytta aýyldyń shetinen jaıylymy bar qora satyp alyp, jylqy basyn 20-ǵa jetkizsem dep otyrmyn», – deıdi Aqylbek Aınabekov.
Bir jaqsysy – alymshylar alǵan somanyń 10 paıyzyn ár alty aı saıyn tólep otyrady. Al jyldyq tólem úlesi 6 paıyzdy quraıdy.
Qazyǵurt aýdandyq jumyspen qamtý ortalyǵynyń dırektory Raıhan Kerimqulovanyń aıtýynsha, byltyr 354 azamat memleketten qaıtarymsyz grant alǵan. Onyń 341 azamaty 505 myń teńgeden, al 13-i 252 myń teńgeden nesıe alǵan. Budan bólek, byltyr Qazyǵurt aýdanynda 4653 otbasy ataýly áleýmettik kómek alsa, bıylǵy eki aıda olardyń sany 721 otbasyǵa jetip otyr. Jalpy aýdan boıynsha kópbalaly 6300 otbasy turady.
