Qazyǵurttaǵy jol apaty: Aýyr jaraqattanǵan eki jolaýshy jansaqtaý bóliminen shyǵaryldy
QAZYǴURT. QazAqparat – Túrkistan oblysynyń Qazyǵurt aýdanynda bolǵan jol apatynda aýyr jaraqat alǵan eki turǵyn jansaqtaý bóliminen shyǵaryldy. Bul týraly aýdandyq aýrýhananyń bas dárigeriniń orynbasary Naýsharman Boranbaeva málimdedi, dep habarlaıdy QazAqparat tilshisi.
Bas dárigerdiń orynbasarynyń sózinshe, jansaqtaý bólimine túsken segiz naýqastyń bireýine ota jasalǵan.
«Keshe oblys ortalyǵynan bilikti dárigerler shaqyrtylyp, naýqastarǵa tıisti emdik sharalary jasaldy. Aýyr halde túsken bir áıelge ota jasaldy. Onyń jaǵdaıy búgin aýyr ári birqalypty. Jalpy jansaqtaý bólimindegi eki naýqastyń jaǵdaıy qalypty deńgeıge túsýine baılanysty búgin bólimshege aýystyryldy. Qalǵandarynyń jaǵdaılary aýyr ári turaqty kúıinde. Ózge naýqastar jaraqat bóliminde em qabyldaýda. Búgin de keńes alýǵa oblys ortalyǵynan mamandar shaqyrttyq», – deıdi Naýsharman Boranbaeva.
Qazirgi tańda aýrýhanada jatqan 11 naýqastyń 9 er adam, 2 áıel ekeni belgili boldy. Olar Túrkistan men Shymkent qalasynyń jáne Saryaǵash, Maqtaraal aýdandarynyń turǵyndary. Naýqastardyń arasynda jolaýshylarmen qatar kólik júrgizýshileri de bar.
Eske salaıyq, keshe kúndizgi saǵat on birler shamasynda Qazyǵurt aýdanynda tórt kólik bir-birine soǵylyp, 15 adam zardap shekken bolatyn. Túrkistan oblystyq PD ókili jol apaty kóktaıǵaqtan boldy dep málim etti.
