Qazyǵurttaǵy oqýshy ólimi: Bilim mınıstrligi resmı málimdeme taratty
NUR-SULTAN. QazAqparat - QR Bilim jáne ǵylym mınıstrligi Qazyǵurt aýdanyndaǵy M.Áýezov atyndaǵy jalpy orta mekteptiń 8-synyp oqýshysy Mahataı Alıhan Talǵatulynyń mezgilsiz qaıtys bolýyna oraı ata-anasy men týǵan-týystaryna kóńil aıtty, dep habarlaıdy QazAqparat tilshisi.
«Túrkistan oblystyq bilim basqarmasynyń bergen málimeti boıynsha, 2019 jylǵy 5 qyrkúıek kúni Qazyǵurt aýdany M.Áýezov atyndaǵy jalpy orta mektebiniń 8 synyp oqýshysy Alıhan Mahataı dene shynyqtyrý sabaǵynda jyljymaly fýtbol qaqpasymen oınap, nátıjesinde qaqpa ústine qulap, aýyr jaraqat alǵan. Oqıǵa bolǵan jerge jedel járdem shaqyrtylyp, aýdandyq aýrýhanaǵa jetkizilgen. A.Mahataı jansaqtaý bóliminde ota jasaý ústinde saǵat 15.00-16.00 shamasynda qaıtys bolǵan. Búgingi tańda aýdandyq prokýratýra jáne ishki ister bólimi tergeý sharalary júrgizip jatyr», - delingen mınıstrlik taratqan aqparatta.
Atalǵan qaıǵyly jaǵdaı QR BǴM Balalardyń quqyqtaryn qorǵaý komıtetiniń jeke baqylaýyna alynǵan.
Vedomstvo málimetinshe, mektep ákimshiligi oqýshylar men ata-analar qaýipsizdik nusqaýlyǵymen tanystyrylǵanyn málimdegen. Qazirgi tańda mektep ákimshiligine qatysty qyzmettik tekserý júrgizilip, muǵalimder, ata-analar, oqýshylar arasynda qaýipsizdik sharalaryn qoldaný jóninde túsindirme jumystary atqarylýda.
Aıta ketsek, Mahataı Alıhan Talǵatuly 2006 jyly týǵan. Otbasynda bes perzenttiń eń kishisi. Otbasy materıaldyq jaǵdaıy orta. Aldaǵy ýaqytta atalǵan jazataıym oqıǵaǵa qatysty qosymsha aqparat beriletin bolady.
