Qazyǵurtta úsh bıdiń eńseli eskertkishi boı kóterdi

TÚRKІSTAN.QazAqparat - Túrkistan oblysy, Qazyǵurt aýdanyndaǵy «Babalar rýhyna taǵzym» kesheninde qazaqtyń úsh bıiniń eńseli eskertkishi ashyldy. Sharaphana aýylynda ótken saltanatty sharaǵa oblys ákimi Ómirzaq Shókeev pen QR Memlekettik syılyǵynyń ıgeri Asanáli Áshimov, QR Parlamenti Májilisiniń depýtaty Saýytbek Ábdirahmanov pen memleket jáne qoǵam qaıratkeri Qýanysh Aıtahanov syndy azamattar qatysty, dep habarlaıdy QazAqparat tilshisi.

Eńseli eskertkish memleket qaıratkeri, «Jeti jarǵy» jáne «Qojabergen jyraý» qorynyń tóraǵasy Beket Turǵaraevtyń bastamasymen jáne «Túgeıbolat baba» qorynyń esebinen ornatyldy. Uly dala danalarynyń biri - Áıteke bı Báıbekulynyń 375 jyldyq mereı toıyna oraı ulttyń uly bıleri Tóle, Qazybek jáne Áıteke bıge ornatylǵan tas músinderdiń ashylý saltanatynda aımaq basshysy quttyqtaý sóz sóılep, aıtýly sharanyń mańyzyna toqtalyp ótti.

«Búgingi ótkizilip jatqan sharanyń mańyzy orasan zor. Óıtkeni, tarıh qoınaýyndaǵy ataqty bılerdiń esimin qaıta jańǵyrtyp, ónegeli ómirin óskeleń urpaqqa úlgi etýdiń ózi úlken tárbıe ekenin umytpaýymyz kerek. Qazaqstan Respýblıkasynyń Tuńǵysh Prezıdenti, Elbasy Nursultan Nazarbaevtyń el táýelsizdigin nyǵaıtý jolyndaǵy qajyrly eńbegi - «Bolashaqqa baǵdar: rýhanı jańǵyrý», «Uly dalanyń jeti qyry» atty maqalalary qazaqstandyqtar arasynda zor serpilis týǵyzyp, aýqymdy jumystardyń júrgizilýine jol ashty. Mádenıet, bilim, óner salalarynda buryn-sońdy bolmaǵan bastamalar júzege asty. Qazaq halqynyń birligin nyǵaıtýǵa zor úles qosqan ataqty úsh bıdi bir-birinen bólip qaraýǵa bolmaıdy. Olardyń basty maqsaty - el táýelsizdigine qol jetkizý, qazaq halqynyń yntymaǵy men birligin nyǵaıtý edi. «Babalar rýhyna taǵzym» kesheni toǵyz joldyń toǵysynda ornalasqandyqtan, bul nysandar osynda kelýshi týrısterdiń de nazaryn aýdaratynyna senimdimin»,- dedi Ómirzaq Shókeev.

Shamamen 100 mln teńgege turǵyzylǵan eskertkishter Qazyǵurt aýdany arqyly ótetin Shymkent - Tashkent halyqaralyq kúre jolynyń boıynda, «Babalar rýhyna taǵzym» kesheninde boı kóterdi. Osyǵan oraı uıymdastyrylǵan sharada qazaqtyń betke ustar el aǵalary men zııaly qaýym ókilderi úsh bıdiń tarıhymyzdaǵy alar orny erekshe ekenin atap ótti.

«Úsh bıdiń eskertkishin saıabaqtyń qaq ortasyna, kúnshyǵysqa qaratyp ornattyq. Shymkent-Tashkent jolynyń boıynda alystan menmundalap turady. Eskertkishtiń mańdaıyna «Uly dala danalary», «Ulttyń uly bıleri» dep jazyp qoıdyq. Árıne, qazaqta bıler kóp bolǵan. Biraq osy úsh bıdi búkil qazaq moıyndaǵan. Bul ornatylǵan eskerkish eldigimiz ben birligimizdi aıqyndap turady dep senemin»,- deıdi memleket qaıratkeri, «Jeti jarǵy» jáne «Qojabergen jyraý» qorynyń tóraǵasy Beket Turǵaraev.

Jıyn sońy respýblıkaǵa eńbegi sińgen tanymal ánshilerdiń kontserttik baǵdarlamasymen jáne ulttyq sport oıyndarymen jalǵasty. Uly bılerge arnap quran baǵyshtalyp, as berildi.

Aıta keteıik, eskertkishti ornatý ıdeıasyn oılastyryp, tuǵyryna qondyrǵan belgili ultjandy azamat, memleketshil qaıratker, zań ǵylymdarynyń doktory, professor Beket Turǵaraev boldy. Ol ótken jyly osy «Babalar rýhyna taǵzym» keshenine Orbulaq shaıqasy jeńisiniń 375 jyldyq mereıtoıyna oraı jeńis qaharmandary Salqam Jáńgir han men Jalańtós Bahadúrge arnap, ekeýiniń at ústindegi aıbyndy eskertkishteriniń ornatylýyna uıytqy bolǵan edi.