Qazyǵurtta tergeýshi asylyp ólmek bolǵan kórshisin qutqaryp qaldy
TÚRKІSTAN. QazAqparat - Túrkistan oblysy Qazyǵurt aýdanynda tergeýshi ómirimen qoshtaspaq bolǵan turǵyndy qutqaryp qaldy. Ol óz úıinde asylyp ólmek bolǵan er azamatqa alǵashqy kómek kórsetip, qoldan kelgenniń bárin istegen, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, keleńsiz jaǵdaı keshe túngi saǵat 1:30-da oryn alǵan.
«Qazyǵurt APB polıtsııa aǵa leıtenanty, aǵa tergeýshi Serik Túımebaevtyń úıine kórshisi kúıeýim asylyp qaldy dep aıqaılap júgirip keledi. Polıtsııa qyzmetkeri ýaqyt joǵaltpaı shuǵyl áreket etý arqyly jipten er azamatty bosatyp alyp, jedel járdem kóligi kelgenshe alǵashqy kómekti kórsetken. Sodan keıin tergeýshi bolǵan oqıǵa týraly APB kezekshi bólimine habarlady» delingen habarlamada.
Qazirgi tańda sýıtsıd jasaýǵa árekettengen turǵyn aýdandyq aýrýhanada em qabyldap jatyr. Dárigerler onyń jaǵdaıyn qanaǵattanarlyq dep otyr. Óz kezeginde polıtseıler onyń ne sebepti ómirimen qoshtaspaq bolǵanyn anyqtaýda.
