Qazyǵurtta memlekettik qyzmetshiler jasóspirimderdi adaldyqqa shaqyrdy
QAZYǴURT. QazAqparat – Túrkistan oblysy Qazyǵurt aýdanyndaǵy mektepterde «Adaldyq saǵaty» ótti. QR Sybaılas jemqorlyqqa qarsy is-qımyl agenttiginiń bastamasymen jáne Bilim jáne ǵylym mınıstrliginiń qoldaýymen ótken sharaǵa aýdannyń memlekettik qyzmetshileri men oqýshylar belsene qatysty, dep habarlaıdy QazAqparat tilshisi.
Aşybulaq jalpy orta mektebinde ótken sabaqqa «Nur Otan» partııasy Qazyǵurt aýdandyq fılıaly tóraǵasynyń birinshi orynbasary Ábilqasym Qojahan qatysyp, bilim kúniniń alǵashqy sabaǵynda adaldyq, parasat, ádildik jáne senim qundylyqtaryn túsindirip ótti. Oqýshylarǵa, sybaılas jemqorlyqpen kúresýdiń qanshalyqty mańyzdy ekenin, sol sebepti qazirgi tańda sybaılas jemqorlyqqa qarsy kúres memleket saıasatynyń basym baǵyttarynyń biri retinde aıqyndalyp otyrǵanyn jetkizdi.
Ábilqasym Qojahan adaldyq saǵaty barysynda jastarǵa adaldyq, parasat, ádildik jáne senim qundylyqtaryn keńinen túsindirildi. Sonymen qatar, osyndaı jalpyrespýblıkalyq «Adaldyq saǵaty» jyl saıyn dástúrli túrde Bilim kúninde bastaý alyp, jas býynnyń rýhanı bolmysyn kemeldendirý úshin jyl boıy jalǵasatynyn da jetkizdi.
Ol sondaı-aq, elimizdiń bolashaǵy tek bilimdi de adal jastardyń, sanaly urpaqtyń qolynda ekenin aıtyp ótti. Sol úshin jastarǵa jańa oqý jylynda jańa bilimge umtylýdy, bıik jetistikterge jetýdi, oqýda tabysty bolýdy tilep, sózin qorytyndylady.
