Qazyǵurtta kóliktiń terezesinen shyǵyp alyp, jol erejesin óreskel buzǵandar aıyppul tóleıdi

TÚRKІSTAN. QazAqparat – Kólikpen jol boıynda oıqastap, mashına terezesinen shyǵyp, jol erejesin óreskel buzǵandar anyqtaldy. Qazyǵurttaǵy oqıǵa boıynsha jol erejesin buzǵandar aıyppul tóleıdi, dep habarlaıdy QazAqparat tilshisi.

Áleýmettik jelide kólikpen qarsy jolaqqa shyǵyp, oıqastap júrgen, jol erejesin buzǵan bir top jastardyń beınejazbasy tarady. Tártip saqshylary júrgizýshilerdi taýyp, olardyń Petropavl jáne Shymkent qalasynan kelgenderin anyqtady.

«Jol erejesin buzǵan Petropavl qalasynyń 20 jasar turǵynyna QR ÁQBtK-niń 593-baby 1-bóligi «Jol júrisi qaǵıdalarynda kózdelgen jolaýshylar men júkterdi tasymaldaý, qaýipsizdik beldikterin nemese motoshlemderdi paıdalaný jónindegi talaptardy saqtamaý», al Shymkent qalasynyń turǵynyna QR ÁQBtK-niń 595-baby 1-bóligi «Manevr qaǵıdalaryn buzý» boıynsha ákimshilik hattama toltyrdy» - delingen Túrkistan oblysy polıtsııa departamentiniń baspasóz qyzmeti taratqan habarlamada.