Qazyǵurtta kásipker jylyna myń tonna ósimdik maıyn óndiredi
ASTANA. QazAqparat - Túrkistan oblysy Qazyǵurt aýdany Sharbulaq aýyldyq okrýgindegi «Sapa 2002» jaýapkershiligi shekteýli seriktestigi aýyl sharýashylyǵynyń birqatar baǵytyn qatar júrgizip otyr. Sonyń biri - ósimdik maıyn óndirý, dep habarlaıdy Túrkistan oblysy ákiminiń baspasóz qyzmeti.
Jobanyń jalpy quny - 112,5 mln teńge. Óndiris orny ósimdik maıynan jylyna 1000 tonna taýar shyǵarýǵa qaýqarly.
Mekeme basshylyǵy isiniń ilgerilegenin memleket tarapynan kórsetilgen kómekter men jeńildiktermen baılanystyrady.
«Bizde shyǵarylǵan ónim elimizden bólek, Qytaı Halyq Respýblıkasynyń naryǵyna shyǵarylýda. Munda 22 adam jumys isteıdi. Ortasha aılyq jalaqy 70 000 teńge shamasynda. Joǵary sapada shyǵarylatyn taýarǵa degen suranys kúshti, áli de artyp keledi. Aıta ketý kerek, bul jerde kásipkerlikti qoldaýǵa baǵyttalǵan memlekettik baǵdarlamalardyń kómegi mol boldy. Endigi maqsat - osy jobanyń aýqymyn keńeıte túsý», - dedi kásiporyn dırektorynyń orynbasary Eráli Ashırov.
Odan bólek, qojalyq mal bordaqylaýmen de aınalysady. Búginde jalpy 10 myń bas qoıdy bordaqylaýǵa arnalǵan alań salynǵan. Bordaqylanǵan maldyń eti elimizden bólek Reseı, Ózbekstan elderine eksporttalýda. Munda asyl tuqymdy qazaqtyń qylshyq júndi quıryqty jáne merınos qoılaryn ósirilýde. Qazirgi tańda qojalyqta 4 683 bas merınos qoıy, 3 864 bas qazaqtyń qylshyq júndi quıryqty qoıy, 300 bas jylqy, 350 bas iri qara, bar.
Aıta keteıik, sharýashylyqty irilendirý maqsatynda «QazAgroQarjy» aktsıonerlik qoǵamynan jyl saıyn jańa tehnıkalar lızıng negizinde satyp alynady.
