Qazyǵurtta 100 jastan asqan tórt soǵys ardageri turady

QAZYǴURT. QazAqparat - Túrkistan oblysyndaǵy soǵys ardagerleriniń basym bóligi - osy Qazyǵurt aýdanynyń týmasy. Bul aımaqta 100 jastan asqan 4 maıdanger turady, dep habarlaıdy QazAqparat tilshisi.

Qazyǵurt aýdany Jańabazar aýylyndaǵy 100 jastaǵy UOS ardageri Isabaı Júzeev 1922 jyly dúnıege kelgen. Jigittik shaǵy ekinshi dúnıe júzilik soǵyspen qatar kelgen qarııa kóptegen orden-medaldardyń ıegeri.

Jeńisti Berlınde qarsy alǵan qarııa «búgingi beıbit ómir máńgilik bolsyn» dep tileıdi.

100 jasqa kelgen UOS ardageriniń biri Isa Telikbaev. Ardager nebári 20 jasynda Lenıngrad maıdanyna qatysqan. ІІІ dárejeli «Dańq» ordenimen marapattaldy.

«Lenıngradty qorǵaǵany úshin», «Germanııany jeńgeni úshin» medaldarynyń ıegeri. «Qurmet» ordenimen marapattalǵan. 6 ul-qyzdan 17 nemere, 16 shóbere súıip otyr.

Búgin Túrkistan oblysynyń ákimi Ómirzaq Shókeev Qazyǵurt aýdanyndaǵy soǵys ardagerleriniń úıine arnaıy baryp, Jeńis kúnimen quttyqtady.

Ardaqty aqsaqaldarǵa qurmet kórsetti.

«Jas urpaq, tarıh sizderdiń erlikterińizdi umytpaıdy. Adamzat tarıhyndaǵy eń kúrdeli ári zulmat soǵysta bizdiń batyr atalarymyz erlik kórsetip, Uly Jeńiske úles qosty. Solardyń qatarynda Túrkistan oblysynyń da ardagerleri bar. Ardagerlerimizge turaqty túrde qoldaý kórsetilip keledi. Óıtkeni olar – kózi tiri qaharmandar», – degen Ómirzaq Shókeev aqsaqalmen tildesip, syılyq tabys etti.

Batyr atalar el azamattaryna aq batalaryn berip, Táýelsizdik máńgi bolsyn degen tilekterin jetkizdi.

Aıta keteıik, búginde Túrkistan oblysynda 5301 soǵys ardageri men olarǵa teńestirilgender turady.

Onyń ishinde 22 soǵys ardageri men soǵys múgedegi urpaqqa ónege berip júr. Bıyl olarǵa 1 mln teńgeden qarjylaı kómek berildi.

Oblysta Uly Otan soǵysyna qatysýshylary men múgedekterine teńestirilgender sany 154 bolsa, 5 myńnan astam tyl eńbekkeri bar.