Qazyǵurt turǵyny aýyl balalaryna aǵylshyn tilin tegin úıretedi
Turbat aýylynda turatyn azamat jastaıynan túrli qoǵamdyq júmystarǵa belsene atsalysyp, óziniń bilimdiligimen erekshe kózge túsken. Mektep bitirgen soń, aǵylshyn tili páni mamandyǵyn alǵan ol 2012 -2013 jyldary ASAA jáne Tesh qoǵamdyq birlestikterinde erikti bolyp jumys isteı bastaǵan.
«Bul uıymda men erikti retinde ár túrli deńgeıdegi is-sharalardy, Shymkent qalasynda bolǵan Ortalyq Azııadaǵy ACCESS baǵdarlamasyn aıaqtaǵan stýdentteri úshin uıymdastyrylǵan konferensııany uıymdastyrýǵa kómektestim. Keıinnen ózimniń aýylymdaǵy úıde aýyl balalaryna aǵylshyn tilin tegin úıretip, erikti retinde aýyl jastaryn belsendiligin arttyrý maqsatynda trenıng semınarlar uıymdastyryp otyrdym. 2014 jyldan bastap Qazyǵurt aýdanynda «Jalynda jastar» qoǵamdyq birlestigin quryp, aýyl jastaryna aǵylshyn tili páninen sabaq bere bastadym. Osy jyldar ishinde Access Microscholarship baǵdarlamasynyn úılestirýshisi retinde jumysymdy jalǵastyrdym»,- deıdi Sardor Ismanov.
2016 jyly Amerıkanyń Qazaqstandaǵy elshiliginiń «Jas kóshbasshy» nomınatsııasy boıynsha jenimpaz atanǵan azamat dál sol jyly BUU Modeli atty Almatyda ótetin halqaralyq konferentsııasyna qatysý úshin grant utyp alady.
Sonymen qatar «Bereke» qoǵamdyq birlestiginiń «Aýyldaǵy úkimetti emes uıymdardyn belsendilikterin arttyrý» atty konkýrsyna qatysyp, «Aýyl jastarynyń belsendiligin arttyrý» atty jobasymen jeńimpaz atanady.
Bes aı kóleminde Qazyǵurt pen Turbat aýyldaryndaǵy jastar arasynda trenıng ótkizedi. Qazǵurt aýdanynda týrızmdi damytý maqsatynda Shymkent qalasyndaǵy ornalasqan Marko Polo uıymymen birelse Etno týrızm jobasyn damytýdy qolǵa alǵan. Sóıtip Qazyǵurt aýdanyna AQSh, Ispanııa,Frantsııa sııaqty damyǵan elderden 200-ge tarta týrısterdiń kelýine óz úlesin qosqan.
Ózi bir jarym jyl boıy AQSh elinde turyp, bilimin jetildirgen Sardor Ismanov aýyl jastarynyń til úırenip, ózderin jan-jaqty damytýlaryna zor úlesin qosyp keledi.
«Osy ýaqytqa deıin myńnan astam jas pen oqýshyǵa aǵylshyn tilin úırettim. Olardyń basym kópshiligi qazirgi tańda túrli joǵary oqý oryndarynda bilim alyp, óz pikirlerin aǵylshyn tilinde erkin jetkize alatyny meni qýantady. 2015 jyldan bastap «Jalynda jastar» qoǵamdyq birlestiginde 25- ke tarta erikti jas uıymmen birge jumys atqaryp jatyr. 2015 jyldyń sáýir aıynan bastap jeke kásipker retinde jańadan oqý ortalyǵyn ashyp, jumyssyz júrgen 8 muǵalimdi jumyspen qamtyp otyrmyn»,-deıdi aǵylshyn tiliniń muǵalimi.
2015 jyly onyń Qazaqstandaǵy AQSh Elshiliginiń bilim berý — Access eki jyldyq mıkrostıpendııasy boıynsha usynylǵan jobasy úzdik dep tanylyp, Qazyǵurt kentine mıkrostıpendııaǵa grant bólingen. Osydan keıin sheteldikter men elshilik ókilderi aýylǵa jıi kele bastaıdy. Bastysy bul joba aýyldaǵy turmysy tómen nemese muqtaj otbasylardaǵy balalardyń aǵylshyn tilin tegin úırenýge zor múmkinshilik týǵyzǵan.
«Bizdiń aǵylshyn tili kýrstarynda tegin oqyǵan 20 oqýshy boldy. Biz olardy eriktilikpen aınalysýǵa úırettik. Sebebi, bul Access baǵdarlamasynyń sharty boldy. Biz balalarmen birge qart kisilerge baryp, úı sharýalaryna kómektestik. Adamdar, ásirese eresekter, erikti sózdiń maǵynasyn áli túsinbeıdi. Jegenmen keıbir jastar shyn máninde eriktilikten paıda izdemeı, óz mindetterin taza júrekpen jasaıdy. Men óz aýylymdy óte jaqsy kóremin Sondyqtan aýylymda bolyp jatqan keıbir sybaılas jemqorlyq jáıtterine ashyq túrdi qarsy pikir bildirip otyramyn. Joldar sapasyz salynsa nemese jaryq shamdar ornatylmasa, muǵalimderden para alý jáıtteri bolyp jatsa dereý áleýmettik jelige jarııalap, máseleniń oń sheshilýne atsalysyp kelemin. Men aýyl balalarynyń da óz múmkindikteri paıdalanǵanyn qalaımyn. Biz kóptegen qyzyqty jobalardy ótkizýge tyrysamyz, bul olardyń jetekshilik qabiletin damytýǵa yqpal etedi. Múmkin men kóp aqsha tappaımyn, biraq meniń jumysym maǵan lázzat syılaıdy», - deıdi Sardor Ismanov.
