Qazyǵurt pen Saryaǵashta mal sharýashylyǵy damyp keledi - OQO
ASTANA. QazAqparat - Ońtústik Qazaqstan oblysy ákiminiń baspasóz qyzmeti «OQO-nyń mal sharýashylyǵyndaǵy jetistikteri» taqyrybyndaǵy medıa aptalyq aıasynda Qazyǵurt pen Saryaǵash aýdandaryndaǵy birqatar sharýa qojalyqtaryna óńir tilshileri úshin aqparattyq týr uıymdastyrdy. Oblys ákiminiń tapsyrmasyna oraı uıymdastyrylǵan sharada BAQ ókilderi úlgili kásipkerlerdiń bıznesti bastaý tarıhymen tanysyp, odan kórip otyrǵan paıdasy týraly surap bildi.
Jýrnalıster úshin usynylǵan birinshi nysan Qazyǵurt aýdany, Sharaphana aýylyndaǵy bııazy júndi qoı ósiretin «Samat» sharýa qojalyǵy boldy. 2001 jyly qurylǵan qojalyqtyń tóraǵasy Samat Turǵaraev esimdi kásipker. Búginde munda 3 myńǵa jýyq bııazy júndi qoı ósiriledi. Seriktestik ujymy 2006 jyly "Ońtústik Qazaq merınosy" statýsyn alsa, 2010 jyly "Jergilikti qazaq jylqysy" statýsyn ıelengen. Al 2011 jyly etti baǵyttaǵy «Asyl tuqymdy mal» iri qara mal sharýashylyǵy statýstaryn alǵan. Sharýashylyqta 20 adam turaqty jumyspen qamtylǵan. Jylyna 12 tonnaǵa jýyq bııazy jún óndiredi.
Jalpy, oblysta 32 myńǵa jýyq bııazy júndi qoı ósirýmen aınalysatyn 20 sharýashylyq bar. Olardyń basym kópshiligi Saryaǵash pen Qazyǵurt aýdanynda ornalasqan. Al júndi qaıta óńdeıtin Shymkent qalasynda eki kásiporyn jumys isteıdi. Olar - «Shymkent Kashemır» JShS men «Qýat-2002» JShS. Atalǵan kásiporyndar byltyr 1200 tonnaǵa jýyq júndi satyp alyp qaıta óńdegen. Óńdelgen júnnen kıiz jáne jylý saqtaıtyn ónimder shyǵarylady. Bıyl 117 tonna bııazy júnge ár kelisin 130 teńgeden, jalpy 15,2 mln. teńge sýbsıdııa berý josparlanýda.
Munan soń, tilshiler toby Saryaǵash aýdanyndaǵy qus ósiretin «Besqara» JShS-nde boldy. Tóraǵasy Murat Ábdibaev bolyp tabylatyn qus fabrıkasy 2015 jyly jumysyn bastaǵan. Búginde munda 50-den astam adam turaqty jumyspen qamtylǵan. Fabrıkada jylyna 20 mln. dana taǵamdyq jumyrtqa óndirilip, oblystaǵy aýdan, qalalarǵa jóneltiledi.
Aıta ketý kerek, Ońtústik Qazaqstan oblysynda 30-ǵa jýyq qus fabrıkasy bolsa, onda búgingi tańda 1,3 mln. bas qus ósirilip, jylyna 180 mln. danaǵa jýyq jumyrtqa alynady. Taǵamdyq jumyrtqalar, negizinen, ózimizdiń oblysta saýdalanady.
Aýdandarǵa press-týr kezinde jýrnalıster barǵan sońǵy sharýashylyq Saryaǵashtyń Darbaza aýylyndaǵy asyl tuqymdy sútti baǵyttaǵy iri qara maldardy ósirý jáne sút óndirýmen aınalysatyn «Fırma Saken» JShS boldy. 2004 jyly jumysyn bastaǵan qojalyqtyń tóraǵasy Shárikúl Baıǵazıeva bul sharýashylyqty jeke qarajatyna - 2 mln. teńgege ashqan. Búginde mundaǵy 594 ІQM-dy kútip-baǵý úshin 19 adam turaqty jumyspen qamtylǵan. Jylyna 400 tonnaǵa jýyq sút óndirip, ony oblysymyzǵa satady.
Oblysta sút óndiretin 800-ge jýyq sharýashylyq bar. Basym kópshiligi Saıram, Shymkent qalasynda ornalasqan. Aǵymdaǵy jyly memleketten jalpy sút óndirisi qunyn arzandatýǵa 372,5 mln. teńge qarajat qaralýda.
