Qazyǵurt pen Saryaǵash aýdandaryndaǵy jaǵdaıǵa baılanysty komıssııa quryldy
TÚRKІSTAN. QazAqparat-Túrkistan oblysynyń ákimi Ómirzaq Shókeevtiń tapsyrmasymen Qazyǵurt jáne Saryaǵash aýdanyndaǵy jaýyn-shashyn saldaryn joıý boıynsha arnaıy komıssııa quryldy, dep habarlaıdy QazAqparat tilshisi.
Túrkistanda ótken májiliste oblys ákimi Ómirzaq Shókeev eldi mekenderdi sýdan tazartyp, turǵyndarǵa zań aıasynda kómek kórsetýdi tapsyrdy.
«Qazyǵurt pen Saryaǵashtaǵy jaǵdaı boıynsha arnaıy komıssııa qurylyp, shyǵyndar obektıvti eseptelýi tıis. Mal shyǵyny boıynsha Aýyl sharýashylyǵy basqarmasy tıisti sheshim qabyldap, zań sheńberinde óz mindetterin oryndasyn. Bul – jergilikti, aýdandyq deńgeıde sheshiletin másele. Bizdiń jiti nazarymyzda tur», – dedi Ómirzaq Shókeev.
Túrkistan oblystyq tótenshe jaǵdaılar departamentiniń bastyǵy Nurǵalı Júnisov Qazyǵurttaǵy 4 eldi meken men Saryaǵashtaǵy bir eldi mekende jaýyn-shashyn saldaryn joıý baǵytynda túnimen jumys júrgenin, áli de jalǵasyp jatqanyn málimdedi.
Anyqtalǵandaı, 53 úıdiń aýlasyna, sonymen birge 18 úı, 1 meıramhana men 16 ǵımaratqa sý kirgen.
Tótenshe jaǵdaı saldaryn joıýǵa oblystyq tótenshe jaǵdaılar departamentiniń 56 jáne jergilikti ákimdiktiń 19 qyzmetkeri jumyldyrylǵan. 15 tehnıka men 13 motopompa jumys istep tur.
«Adam shyǵyny joq, jaǵdaı tolyq baqylaýǵa alynǵan. Mal shyǵyny eseptelýde. Jalpy, qaýip-qater seıildi. Evakýatsııalanǵan 50 turǵyn óz úılerine qaıtaryldy. Jumys jalǵasyp jatyr», – dedi departament bastyǵy.
Aıta keteıik, keshe túnde jaýǵan jańbyrdan Túrkistan oblysyndaǵy Qazyǵurt jáne Saryaǵash aýdandaryndaǵy birshama eldi mekenderde sel júrip, úıler men aýlalardy sý basty.
