Qazyǵurt aýdanyndaǵy joldar jóndeýden ótýde
TÚRKІSTAN. QazAqparat – Túrkistan oblysy, Qazyǵurt aýdanynda 52 shaqyrym jol jóndeýden ótýde. Jyl sońyna deıin 30 shaqyrymnan astam kólik joldarynyń qurylysy tolyq aıaqtalyp, paıdalanýǵa berilmek, dep habarlaıdy QazAqparat tilshisi.
Búginde aýdan aýmaǵynan ótetin oblystyq mańyzy bar joldardyń uzyndyǵy 250 shaqyrymnan asady. Avtomobıl joldarynyń jalpy jaǵdaıy jaıly Túrkistan oblysynyń ákimi Ómirzaq Shókeevtiń aýdanǵa jasaǵan jumys sapary barysynda baıandaldy. Óńir basshysy Sharaphana-Jańabazar avtojolynyń kúrdeli jóndeý qurylysymen tanysty. Joldyń uzyndyǵy 16 shaqyrymdy quraıdy.
Sondaı-aq ol aımaqta salynyp jatqan jańa nysandardy aralady. Jańabazar aýyl okrýgi, Úshbastaý eldi mekenindegi 200 oryndyq «K.Ázerbaev» atyndaǵy jalpy orta mektebiniń qurylys alańynda boldy. Bilim uıasy bıylǵy oqý jylyna qarsy ashylmaq. Túrkistan oblysynda qurylysy júrip jatqan 50-ge jýyq orta mekteptiń tórteýi Qazyǵurt aýdanynda boı kótergen.
Jumys sapary barysynda aımaq basshysy óz úıiniń janynan mal bordaqylaý alańyn ashyp, kásibin dóńgeletip otyrǵan jeke kásipkerdiń jumysymen tanysty. Nebári 10 mal basymen tirlik bastaǵan Jańabazar aýylynyń turǵyny qysqa ýaqyt ishinde ony 200-den asyrǵan.
Qazyǵurt aýdanyndaǵy jalpy analyq mal basynyń sany 54 myńǵa jetkizilgen. Tuqymdyq túrlendirý úlesi bıyl 170 %-dy qurap otyr.
