Qazyǵurt aýdanyndaǵy jalpy óńirlik ónim kólemi 130 mlrd teńgeden asqan
QAZYǴURT. QazAqparat – Túrkistan oblysyna qarasty Qazyǵurt aýdanynyń ákimi Tólegen Telǵaraev Qaqpaq, Qyzylqııa aýyldyq okrýgterindegi halyqpen kezdesip, ótken jyly atqarǵan jumystaryn baıandap ótti. Aýdan basshysynyń kezekti esep berý jıynyna QR Prezıdenti Ákimshiliginiń memlekettik ınspektory Serik Qojanııazov arnaıy qatysty, dep habarlaıdy QazAqparat tilshisi.
Tólegen Telǵaraevtyń aıtýynsha, aýdandaǵy jalpy óńirlik ónim kólemi byltyr 130 mlrd 782,1 mln teńgege jetken. Bul aldyńǵy jylmen salystyrǵanda 121,6 paıyzǵa artyq oryndalǵanyn kórsetedi. Al, aýdanǵa tartylǵan ınvestıtsııa kólemi 19 mlrd 851 mln teńgeni quraǵan.
«Búgingi tańda, «Qazyǵurt» ındýstrııalyq aımaǵynda 7 mlrd 300 mln teńgelik 5 joba júzege asyrylýda. Onda 193 azamat turaqty jumyspen qamtylǵan. Aýdanda jumys istep turǵan 19 ónerkásip orny 7 mlrd 840 mln teńgeniń ónimin óndirdi. Naqty kólem ındeksi 105,2 % qurap, 2018 jylmen salystyrǵanda 412 mln teńgege artyq ónim shyǵarylǵan», – dedi aýdan ákimi.
Sondaı-aq, aýdan ákimi atalǵan aýyldarda atqarylyp jatqan jáne aldaǵy ýaqytta iske asyrylatyn josparlarymen bólisti. Máselen, Qaqpaq aýylynda mal bordaqylaý sharýashylyǵy keńinen damyp keledi. Osy baǵytty keshendi túrde júzege asyryp otyrǵan mekemeniń biri «Qarqyn 2030» JShS. Atalǵan kásiporyn «Narlen» markaly et ónimderin óndirýmen de aınalysady. Zamanaýı tehnologııamen jumys isteıtin tsehta shujyqtyń 52 túri óndiriledi. 180 turǵylyqty azamat turaqty jumyspen qamtylǵan. Seriktestik táýligine 10 tonna ónim shyǵaryp, ótken jyly 22 tonna shujyq ónimderi alys ta jaqyn shetelderge eksporttalǵan. Qazirgi tańda seriktestiktiń aýqymyn keńeıtý maqsatynda 3 myń mal basyna arnalǵan mal bordaqylaý alańyn salýdy qolǵa alǵan. Al, Qyzylqııa aýyldyq okrýgindegi «Daıan» sharýa qojalyǵy lımon óndirýmen aınalysyp keledi. Ótken jyly ónim kólemin 25 tonnaǵa jetkizip, Reseıge eksporttaýdy bastaǵan.
Jıyn sońynda aýdan turǵyndary Tólegen Telǵaraevqa kókeıde júrgen saýaldaryn qoıyp, naqty jaýaptaryn aldy. Óz kezeginde eseptik jıyndy qorytyndylaǵan QR Prezıdenti Ákimshiliginiń memlekettik ınspektory Serik Qojanııazov ótken jyly aýdanda atqarylǵan jumystarǵa oń baǵasyn berdi.
