Qazyǵurt aýdanyndaǵy mektep elimizdegi úzdik ondyqqa endi
ASTANA. QazAqparat - Ońtústik Qazaqstan oblysy Qazyǵurt aýdanyndaǵy Jambyl Qapparov atyndaǵy №5 mamandandyrylǵan fızıka-matematıkalyq mektep ınternaty ótken oqý jylynyń qorytyndysy boıynsha elimizdegi úzdik 10 mekteptiń qataryna endi, dep habarlaıdy OQO ákimdiginiń baspasóz qyzmeti.
Sebebi, atalǵan bilim uıasyn bitirip shyqqan túlekterdiń 98 paıyzy Ulttyq biryńǵaı testileýde joǵary nátıjege qol jetkizip, memlekettik grant ıeleri atanyp otyr. Shákirtterin bilim nárimen sýsyndatyp otyrǵan 10 jyl ishinde ozat mektepter ondyǵyna ený - bul bilim uıasy úshin úlken mártebe.
Munda búginde aýdan, qalalardan kelgen 400-ge jýyq oqýshy oqyp jatyr. Al balalarǵa 48 joǵary bilimdi muǵalim, 2 fızıka matematıka ǵylymdarynyń kandıdaty, 2 dotsent pen pedagogıka ǵylymdarynyń kandıdaty dəris beredi.
Mektep dırektory Jańabaı Ahmetovtyń aıtýynsha, mundaǵy muǵalimderdiń 20-sy deńgeılik kýrstan ótken. Barlyq oqý materıaldary jańartylǵan. Arnaıy fızıka, matematıka, hımııa, bıologııa, ınformatıka mýltımedııalyq kabınetter zaman talabyna saı jabdyqtalǵan.
Úsh qabatty ǵımaratta 29 oqý kabıneti, 2 mýltımedııalyq kabınet, pándik kabınetter, zerthanalar men sport zaly, kitaphana, 7 ınteraktıvti qurylǵy, 15 synyp kesheni bar. Sonymen qosa, balalarǵa arnalǵan 300 oryndyq jataqhana men úsh mezgil ystyq tamaǵy bar.
Jańa oqý jylyn jaqsy jańalyqpen bastaǵan bilim oshaǵy endi sol bıikte qalýdy maqsat tutyp otyr.
