Qazyǵurt aýdanynda jańadan salynǵan 6 mektep qoldanysqa berildi

QAZYǴURT. QazAqparat – Túrkistan oblysy Qazyǵurt aýdanynda jańadan salynǵan 6 mektep paıdalanýǵa berildi. Bilim kúnine oraı esigin aıqara ashqan nysandardy salýǵa qazynadan 3 mlrd 613 mln teńge jumsaldy, dep habarlaıdy QazAqparat tilshisi.

Onyń ishinde respýblıkalyq bıýdjet esebinen salynǵan - 300 oryndyq M.Áýezov, Jylybulaq mektepteri, oblystyq bıýdjetten - 200 oryndyq Zańǵar, 150 oryndyq Tilektes, aýdandyq bıýdjetten - 100 oryndyq Aqqum men P.Akbarov mektepteri bar. Jańa mektep ǵımarattarynyń ashylýy aýyl turǵyndary, oqýshylar men ustazdar úshin kópten kútken qýanysh boldy. Jańa ǵımarattar zaman talabyna saı salynyp, muǵalimder men oqýshylarǵa barlyq jaǵdaı jasalǵan.

Barlyq pán kabınetteri men sheberhanalar, sportzal, akt zaly, kitaphana, ashana jáne medıtsınalyq kabınettermen qamtylǵan. Zamanaýı úlgide salynǵan bilim oshaqtarynyń ashylý saltanatyna aýdan basshylary men aýyl turǵyndary qatysyp, ustazdar men oqýshylardy Bilim kúnimen quttyqtady.

«Urpaq bolashaǵynyń basty eńbek etetin mektep ustazdary. Elimizdiń erteńi-jas urpaqty óz halqynyń tarıhyn, tegin, salt-dástúrin, tilin bilýi men adamzattyq mádenıetti túsinetin shyǵarmashyl tulǵa etip tárbıeleý jańa zamannyń basty talaby bolyp tabylady. Endigi mindet, osy jańa mektepterdi, oqý jabdyqtary men kabınetterin kózdiń qarashyǵyndaı etip uqypty ustaý. Sonymen birge jas urpaqqa sanaly tárbıe, sapaly bilim berýde ustazdar qaýymyna jaýapkershilik arta túsedi. Jańa oqý jylynda paıdalanýǵa berilgen mektepter barshamyzǵa qutty bolyp, jas urpaqtarymyzdyń bıik belesterden kórinýine tilektespin!»,- dedi aýdan ákimi Tólegen Telǵaraev.