Qazyǵurt aýdanynda turǵyn úıler jaýyn sýynan tazartyldy
QAZYǴURT. QazAqparat – Qazyǵurt aýdanynda tasqyn sýdyń qaýpi seıilip, turǵyn úıler jaýyn sýynan tazartyldy. Kókibel sý qoımasy mańynda evakýatsııalanǵan 133 turǵynnyń jaǵdaıy turaqtalyp, qajetti azyq-túlik pen basqa da qajetti zattar jetkizilýde, dep habarlaıdy QazAqparat tilshisi.
Búginde qaýipsiz jerge kóshirilgender týǵan-týystarynyń úılerine jaıǵasqan. Olarǵa aýdan ákimdiginiń uıymdastyrýymen tıisti kómekter kórsetilip jatyr. Jedel uıymdastyrý sharalarynyń nátıjesinde Altyntóbe, Jigergen aýyl okrýgterindegi 6 úıdiń aýlasynan sý tartý men aryqtardy tazalaý jumystary júrgizilip, tolyǵymen aıaqtalǵan. Qazirgi tańda turǵyndarǵa eshqandaı qaýip tónip turǵan joq.
Aıta keteıik, 13 mamyr kúni Altyntóbe, Jigergen aýyl okrýgterinde úılerdiń aýlasyna jańbyr sýy jınalǵan bolatyn. Oqıǵa ornyna aýdandyq tótenshe jaǵdaılar bólimi men aýdan ákimdigi qyzmetkerleri shyǵyp, turǵyndarǵa der kezinde kómek kórsete bildi.
