Qazyǵurt aýdanynda qarttar arasynda sporttyq jarys ótti
QAZYǴURT. QazAqparat – Túrkistan oblysy Qazyǵurt aýdanynda halyqaralyq qarttar kúni qarsańynda erekshe saıystar uıymdastyryldy. 13 aýyldyq okrýgte turatyn zeınetkerler sporttyń birneshe túrinen ózara jarysty, dep habarlaıdy QazAqparat tilshisi.
Aýdandyq sport bóliminiń uıymdastyrýymen «Jeńis» sport kesheninde ótkizilgen is sharaǵa aýdannyń zııaly qaýym ókilderi men jergiliti turǵyndary qatysyp, qarttardy merekemen quttyqtady.
«Qaı zamanda bolmasyn qoǵamda qarııalarǵa degen qurmet, izet-iltıpat erekshe bolǵan. Olardyń danalyqtary men ómirden túıgen mol tájirıbesine den qoıyp otyrǵan. «Qarty bar eldiń qazynasy bar» demekshi, osy mereke qarsańynda qarııalarymyzǵa qandaı qurmet kórsetsek te, artyqtyq etpeıdi. Qarttarǵa qamqorlyq - halqymyzdyń sanasyna tereń sińgen qasıet. Ardagerler – elimizdiń altyn qory. Olar búkil sanaly ǵumyryn, qajyr-qaıratyn el ıgiligine, urpaq tárbıesine jumsady. Keıingi býyn da óz kezeginde aldyńǵy tolqyn aǵalardyń salǵan sara jolyn laıyqty jalǵastyryp keledi«,- dedi sharaǵa qatysýshy aýdandyq ardagerler keńesiniń tóraǵasy Amanbaı Omarov.
Sharanyń ashylý saltanatynda aýdandyq sport bóliminiń basshysy Quralbek Buqarov ta ardagerlerdi merekemen quttyqtap, oıyn barysynda sáttilik tiledi. Sonymen sporttyq saıysqa 30-ǵa tarta aýyl aqsaqaly qatysyp, shahmat, doıby jáne bılıard oıyndary boıynsha saıysty. Budan bólek, jarysqa aqsaqaldardyń nemereleri de qatysyp, shar jınaý, estofetalyq oıyndar, kengýrý, kim jyldam oıyndarynan jarysty. Barlyq jeńimpazdarǵa syı-syıapattar taratyldy.