Qazyǵurt aýdanynda eki eldi mekenge gaz berildi
QAZYǴURT. QazAqparat – Túrkistan oblysy, Qazyǵurt aýdanynda eki eldi mekenge tabıǵa gaz berildi. Turbat aýylynda ótken saltanatty jıynǵa aýdan ákimi Tólegen Telǵaraev qatysyp, turǵyndardyń qýanyshyna ortaqtasyp qaıtty, dep habarlaıdy QazAqparat tilshisi.
Qazyǵurt aýdanyndaǵy Altyntóbe, Turbat aýyldarynyń turǵyndary kógildir otyndy kópten beri kútken bolatyn. Endi jergilikti halyq tabıǵı gazdyń sharapatyna qol jetkizdi. Búginde aýdan kóleminde tabıǵı gaz júrgizilgen 47 eldi mekenniń 41-inde turǵyndar kógildir otyndy paıdalanyp, bul aýdandaǵy gazben qamtylý deńgeıi 64 paıyzdy qurap otyr. Saltanatty jıynǵa qatysqan aýdan basshysy jınalǵan jurtshylyq aldynda quttyqtaý sóz sóılep, ózge eldi mekenderge gaz jetkizý máseleleri qaralyp jatqanyn atap ótti.
«Árbir otbasynyń berekesi, jylýy – oshaǵy. Tutas eki aýyldyń oshaǵynda janǵan kógildir otyn árbir otbasyna jylylyq syılap, erteńgi kúnge degen senimderin eseleı túseri sózsiz. Qazir elimiz damýdyń jańa kezeńine qadam basty. Aýyldy kórkeıtý, aýyz sýmen qamtý, kógildir otyn jetkizý, halyqtyń ál-aýqatyn arttyrý qazirgi kúnniń basty mindetteri»,- dedi Tólegen Telǵaraev.
