Qazybek Isa Ulytaýda Joshy hanǵa eskertkish turǵyzýdy usyndy - Ulttyq keńes
«Endigi máselemiz ulttyq rýhty kóterý - eń basty mindetimiz. Ulttyq múddeni qorǵaý ulttyq rýhty oıatýdan bastalady. Taıaýda ult tarıhyndaǵy Ulytaýǵa Qasym-Jomart Toqaev Qazaqstan Prezıdenti retinde tuńǵysh sapar jasap, zııarat etip qaıtty. Bosqa barǵan joq. Kúlli túrki álemine úlgi bolatyn ordaly oı aıtty. Eýrazııa keńistiginde erekshe zor alyp ımperııa Altyn ordanyń 750 jyldyǵyn merekeleý týraly bastama kótergen Memleket basshysy: «Shyńǵys hannyń úlken uly Joshynyń mazary qazaq jerinde turǵanyn búginde elimizde jáne sheteldegi jurtshylyqtyń kópshiligi bile bermeıdi. Onyń tarıhı tulǵasyna álemniń nazaryn aýdaryp, kesenesin mádenı týrızm nysanyna aınaldyrý óte mańyzdy mindet», dep atap ótti. Memleket basshysynyń Ulytaý sapary men ulaǵatty sózderi rýhymyzdy kóterip, eńsemizdi bıiktetti. Iá, Altyn ordanyń atasy Joshy hannyń tulǵasyn saqtaý túgel túrki jurtyna ortaq is»,- dedi ol.
Ulttyq keńes múshesi alyp ımperııanyń alǵashqy astanasy Saraıshyqta Altyn ordanyń tizginin balasy Batý hanǵa tapsyryp ketken ákesi, uly hanymyz Joshy da qazaq jerinde jatqanyn aıtty.
«Birinshiden, Joshy hannyń Ulytaýda taqqa otyrǵanyna 2023 jyly 800 jyl tolady. Qazaq memleketi tarıhyndaǵy eldik mańyzy erekshe zor bul mereıtoı memlekettik deńgeıde toılanýy tıis. Mine, Qazaqstan Prezıdenti aıtqandaı, Joshy hanǵa álem nazaryn aýdarar naǵyz kezeń bastaldy deýge bolady. Osyndaı álem tarıhynda salmaǵy orasan sańlaq tulǵalar men mańyzdy zor qalalar ózge bir eldiń enshisinde bolsa ne bolar edi? Árige barmaı-aq Memleket basshysy aıtqan kishkentaı Mońǵolııanyń ózi Joshy hannyń ákesi álemdi bılegen Shyńǵys han arqyly dúnıejúzine dúbirin tanytyp jatyr. Múmkin biz de Shyńǵys hannyń alyp eskertkishindeı Joshy hanǵa odan da kem emes eskertkish keshen turǵyzarmyz. Ol keshende Joshynyń anasy Bórte de, balasy Batý han da, ákesi Shyńǵys hannyń da eskertkishi tursa tipti keremet bolar edi. Al Ulytaýda mazary jatqan Joshy hannyń eskertkishin Qazaqstan Prezıdenti Qasym-Jomart Toqaev turǵyzyp jatsa, ult rýhy dúr silkiner dúnıe bolar edi», - dedi Qazybek Isa.
