QazUÝ túlekteri qazaqstandyq elıta tobyn qalyptastyrýshy zııaly qaýym ókilderi - rektor B.Jumaǵulov
ALMATY. Qyrkúıektiń 1-i. QazAqparat /Ádilet Musahaev/ - Ál-Farabı atyndaǵy Qazaq ulttyq ýnıversıtetinde bilim kúni rektor, akademık Baqytjan Jumaǵulovtyń «Ýnıversıtet álemdik ınnovatsııalyq úderiste» atty bas dárisimen bastaldy, dep habarlaıdy QazAqparat, QazUÝ-dyń baspasóz qyzmetine silteme jasap.
QazUÝ rektory Stýdentter saraıyna jınalǵan 2 myńǵa tarta tyńdarmanǵa dáris oqyp, stýdentter tarapynan qoıylǵan suraqtarǵa jaýap berdi. Dáriske 750-den astam «Altyn belgi» ıegerleri, 150-den astam halyqaralyq olımpıadalar men baıqaýlardyń jeńimpazdary, 1000-ǵa jýyq memlekettik granttyń jáne 90 rektorlyq granttyń ıegerleri, sondaı-aq ýnıversıtettiń úzdik oqytýshylary men stýdentteri qatysty.
Rektor ýnıversıtettiń bıylǵy oqý jylyna qabyldanǵan stýdentterdiń basym kópshiligi «Altyn belgi» jáne respýblıkalyq, halyqaralyq olımpıadalardyń jeńimpazdarynan quralǵandyǵyn aıta kele, birinshi kýrs stýdentterin «elıtaly gvardııa» dep atady.
«Qurmetti elıtaly gvardııa, sizderge bilim keńistiginde sát sapar tileımin. Buǵan deıingi tájirıbe kórsetkendeı, QazUÝ túlekteri qazaqstandyq elıta tobyn qalyptastyrýshy zııaly qaýym ókilderi. Endeshe aldyńǵy býyn jolyn jalǵap, zııaly qaýymdy qalyptastyratyn býyn sizder bolasyzdar. Qazaqstandy 2030-ǵa jetkizetin, sol damyǵan qoǵamdy básekege qabiletti etetin de sizder», dep atap ótti óz sózinde Baqytjan Tursynuly.
Sonymen qatar ár fakýltette de dárister oqylyp, ony ǵylym men mádenıettiń, qazaqstandyq jáne halyqaralyq bıznes qoǵamdastyqtarynyń belgili ókilderi júrgizdi. Olardyń qatarynda Ómirzaq Aıtbaev, Karl Baıpaqov syndy akademıkter jáne mádenıettanýshy ári qoǵam qaıratkeri Murat Áýezov bar. Sondaı-aq «Aıqyn» gazetiniń bas redaktory Nurtóre Júsip, "Ekomed" medıtsına ortalyǵynyń dırektory Saltanat Baıqoshqarova syndy taǵy basqa mekeme basshylarynyń dáristeri tyńdaldy.
Ataýly dárister ekonomıka, geografııa, zań, shyǵystaný jáne t.b. salany qamtydy. Ataqty qaıratkerler stýdentterdiń suraqtaryna jaýap bere otyryp, jastarǵa myqty maman bolyp qalyptasý jolyn kórsetip, adam boıyndaǵy daryndylyqty odan ári damyta túsetin keńester berdi.
