QazUÝ tarıhynda tuńǵysh ret aqsaqaldar keńesi quryldy
ALMATY. 30 jeltoqsan. QazAqparat- /Ádilet Musahaev/ - 29 jeltoqsan kúni ál-Farabı atyndaǵy Qazaq ulttyq ýnıversıtetiniń rektory Ǵalymqaıyr Mutanovtyń bastamasymen ýnıversıtet tarıhynda alǵash ret aqsaqaldar alqasy ótti.
Oǵan Qazaqstannyń eńbek sińirgen qaıratkeri, professor, jazýshy Qazaqstan respýblıkasynyń eńbek sińirgen mádenıet qyzmetkeri, Ábilfaıyz Ydyrysov, fılologııa ǵylymdarynyń doktory, professor, akademık Tursynbek Kákishov, etnograf, arheolog, tarıh ǵylymynyń doktory, professor, Qazaqstannyń eńbek sińirgen joǵary mektep qyzmetkeri, Uly Otan soǵysynyń ardageri Ýahıt Shalekenov, qazaqtyń kórnekti zańgeri, qoǵam qaıratkeri, akademık Salyq Zımanov, Belgili qoǵam qaıratkeri, zańger Sultan Sartaev, hımııa ǵylymdarynyń doktory, professor Habıbýlla Ospanov bastaǵan qara shańyraqtyń birneshe ardagerleri qatysty.
Jıyn barysynda tájirıbeli ǵalymdar ál-Farabı atyndaǵy Qazaq ulttyq ýnıversıtetin ulttyq zertteý ýnıversıtetine aınaldyrý jolynda atqarylyp jatqan is-josparlarmen tanysyp, óz keńesterimen bólisti. Bilim ordasy basshysynyń aıtýynsha, zertteý ýnıversıteti jańa ónim shyǵarýǵa túrtki bolýmen qatar, QazUÝ-dy álemdik damyǵan joǵary oqý oryndary reıtıngisiniń aldyńǵy qataryna qospaq.
Jańa bastamada ortaǵa oı tastaǵan aqsaqaldar bilim ordasyn ulttyq zertteý ýnıversıtetine aınaldyrý barysynda ulttyq múdde, memlekettik til, mádenıet, ádebıet máseleleri de nazardan tys qalmaý kerektigin basa aıtty. «Ǵylymnyń ózi tabıǵı jáne gýmanıtarly bolyp bólinetindigin eskersek, biz kóp rette tabıǵı salaǵa basa kóńil bólemiz de gýmanıtarly ǵylym aqsap qalady. Eger mamandarymyz óziniń ulty úshin, memleketimizdi damyǵan elý eldiń qataryna qosýǵa umtylsyn desek osy gýmanıtarly ǵylymdy da dereý qolǵa alýymyz kerek», - deıdi ǵalym Ýahıt Shalekenov.
Sondaı-aq ýnıversıtettiń ardageri Tursynbek Kákishev óz ana tilin, tarıhyn, mádenıetin, ádebıetin bilmeıtin kadr el adamy bola almaıtyndyǵyn aıtady. «Ulttyq zertteý ýnıversıtetine aınalý barysynda «mylqaý mamandar daıyndaýdan» qashýymyz kerek», - dep T.Kákishev óz pikirin bildirdi.
Ádebıet qoǵamnyń úlken máselesi ekendigin eskergen akademık Ǵalymqaıyr Mutanuly QazUÝ-da gýmanıtarlyq máseleler boıynsha keńes qurylatynyn jetkizip, aldaǵy ýaqytta bul salany damytý úshin bilim ordasynda Abaı ilimi oqytylatyndyǵyn aıtty.
Joǵary oqý ornyn Ulttyq zertteý ýnıversıtetine aınaldyrý barysynda fakýltetterde oqytylatyn pánderdiń mańyzdylyǵy da eskerýsiz qalmaý kerek deıdi aqsaqaldar. Osy kezekte Qazaq jýrnalıstıkasynyń ulaǵatty ustazy Ábilfaıyz Ydyrysov ún qatyp, jýrnalıstıka fakýltetinde tarıh, ádebıet sııaqty pánder boıynsha oqytylatyn dáristerdi kóbeıtý kerektigin aıtty.
Alqaly jıyn barysynda birneshe urpaq boıyna izgilik nuryn quıyp, mamannyń adam bolyp qalyptasýyna zııaly eńbek sińirgen aqsaqaldar alqasy QazUÝ-dy Ulttyq zertteý ýnıversıtetine aınaldyrý úshin jasalynǵan josparlarǵa osyndaı oı qosa otyryp, jańa bastamaǵa barynsha qoldaý kórsetindikterin jasyrmady.
Jas urpaqpen aǵa býynnyń arasyndaǵy sabaqtastyq osylaısha ǵylymdy jalǵaý kópirine aınalyp, jańa bastama ǵalymdardan qoldaý tapty. Keıingi tolqynmen zııaly qaýymnyń bulaısha oı bólisip, úndesýi Elbasy aıtqan Intellektýaldy ult qalyptastyrýda úlken úles ekendigi daýsyz. Sondaı-aq, tájirıbeli professorlar avtorlyq quqyq, kitap shyǵarý, kitap taratý, monografııalyq eńbekterge ústemaqy tóleý salasyndaǵy qordalanǵan máselelerdiń sheshimin aıtyp, ǵylymdy damytý jolyndaǵy túıindi saýaldarǵa qan júgirtýge tyrysyp baqty.
