QazUÝ stýdentteri el jastaryn ulttyq jastar qozǵalysyn qurýǵa atsalysýǵa shaqyrdy
Bul sharaǵa 2 myńnan astam jastar - stýdenttik uıymdardyń kóshbasshylary, jas ǵalymdar, startaperler, kásipkerler men eriktiler jınaldy.
Forýmdy ashqan QazUÝ rektory, akademık Ǵalymqaıyr Mutanov qatysýshylardy jastar jylymen quttyqtap, bolashaq tek belsendi ári bilimdi jastardyń qolynda ekenin qadap aıtty.
«Shynynda, kózi ashyq, kókiregi oıaý jastar óte kóp. Osy jasalyp jatqan is-sharalardyń barlyǵy elimizdiń bolashaǵy úshin, al bolashaq - ol jastarmen baılanysty», - dedi rektor.
Bul forým barysynda «Jastardyń shyǵarmashylyǵy men kúsh jigeri - eldiń ınnovatsııalyq damýy úshin» ulttyq jastar qozǵalysyn qurý jónindegi bastamasy usynyldy. Stýdentter el jastaryn qozǵalysqa belsendi qatysýǵa jáne bar bilimin, qabiletin, shaǵyrmashylyǵyn kreatıvti ıdeıalardy, jobalardy jáne ınnovatsııalardy jasap, engizýge shaqyrdy.
«Biz - QazUÝ jastary, Qazaqstannyń barlyq jastaryna úndeý jasaımyz dep sheshtik. Búgingi forýmnyń basty maqsaty - stýdentterdi ǵylym men bilimge baýlı otyra, ınnovatsııalyq ortany, jańashyl ortany, jańa ıdeıasy bar stýdentterdiń platformasyn qalyptastyrý. Eger osy ıdeıany ár ýnıversıtet, ár kásiporyn jáne aımaq qoldaıtyn bolsa, bizdiń elimizde ınnovatsııaǵa jáne ǵylymǵa degen qushtarlyǵy mol qoǵam qalyptasady», - dedi forým uıymdastyrýshysy, QazUÝ jastar óner komıtetiniń jetekshisi Nursultan Bekqaıyrov.
Aıta ketsek, Prezıdent Qazaqstanhalqyna ótken jylǵy Joldaýynda 2019 jyldy Jastar jyly dep jarııalaýdy usynǵan bolatyn. Arada bir aıdan astam ýaqyt ótkennen keıin Elbasy Jarlyǵymen 2019 jyl Jastar jyly bolyp resmı túrde jarııalandy.
