QazUÝ stýdentteri Egov portalyn paıdalanýdy úırendi

ALMATY. QazAqparat - Almaty qalalyq Memlekettik qyzmet isteri jáne sybaılas jemqorlyqqa qarsy is-qımyl departamenti aýdandyq halyqqa qyzmet kórsetý ortalyqtarymen (HQKO) birlese otyryp, Joǵarǵy ekonomıka mektebiniń birinde oqıtyn stýdentter úshin elektrondyq memlekettik qyzmet boıynsha semınar-trenıng ótkizdi, dep habarlaıdy QazAqparat tilshisi.

Stýdentter yńǵaıly ýaqytta kompıýter, planshet, telefon arqyly kommýnaldyq qyzmetterdi qalaı alýǵa bolatynyna kóz jetkizdi.

«Jármeńkeni ótkizýdegi maqsat elektrondy memlekettik qyzmetterdi tanymal etý bolyp otyr. Sebebi bul jańa tehnologııalardy qazirgi zamanǵa engizýge jastar atsalysýy kerek. Jastar ІT-tehnologııalar, gadjet pen Internetti paıdalanýdy jaqsy biledi. Jastar jataqhanadan shyqpaı-aq ınternette sertıfıkattardy nemese elektrondyq qoltańbany ala alady», - dedi departamenttiń bas mamany Gúljan Sabýrova.

Onyń aıtýynsha, sybaılas jemqorlyqty azaıtý maqsatynda saıtqa kirý kezinde bir rettik parol júıesi engiziledi.

«Jeke kýálikti jáne uıaly telefon nómirin bergen azamat arnaıy parol alady. Ol arqyly ınternetten qajettin aqparatyn ala beredi. Saıtqa kirgen saıyn Siz bir rettik parol alasyz. Barlyǵy bizdiń azamattarymyzdyń qaýipsizdigi úshin jasalady. Búgingi kúni 36 memlekettik qyzmet, sonyń ishinde elektrondy qoltańba, mekenjaı týraly aqparat, jyljymaıtyn múlik týraly anyqtama jáne ózge de qyzmetterdi alýǵa bolady», - dedi Almaly aýdanynyń halyqqa qyzmet kórsetý ortalyǵynyń mamany Nurjan Orazbekov.