QazUÝ stýdenti Saǵat Áshimbaev atyndaǵy stıpendııa ıegeri atandy
ASTANA. QazAqparat - Tanymal qoǵam qaıratkeri, pýblıtsıst, telejýrnalıst, ádebıet synshysy Saǵat Áshimbaev atyndaǵy stıpendııa ıegeri marapattaldy, dep habarlaıdy «QazAqparat» HAA tilshisi.
2017 jyldyń naýryz aıynda Saǵat Áshimbaevtyń eńbegi men shyǵarmashylyǵyn keńinen nasıhattaý úshin jýrnalıstıka fakýltetiniń stýdentteri arasynda baıqaý jarııalaý jáne stıpendııa taǵaıyndaý týraly sheshim qabyldandy. Baıqaýǵa ál-Farabı atyndaǵy Qazaq ulttyq ýnıversıteti, E.Bóketov atyndaǵy Qaraǵandy memlekettik ýnıversıteti, L.N.Gýmılev atyndaǵy Eýrazııa ulttyq ýnıversıtetiniń jáne aımaqtyq joǵary oqý oryndarynyń jýrnalıstıka fakýltetterinen 33 stýdent óz jumystaryn usynǵan.
Baıqaý jumystaryn taldaý, saralaý komıssııasy quramyna «Qazaqstan» RTRK AQ Efırlik saıasat dırektsııasynyń bas redaktory Qaınar Oljaı, tanymal telejýrnalıst Nurtileý Imanǵalıuly, «Qazaqstan Respýblıkasy Prezıdentiniń Teleradıokesheni» KEQ Prezıdenti Erlan Bekhojın, «Qazaqstan» RTRK AQ Aımaqtyq habar taratýdy damytý dırektsııasynyń dırektory Erjanar Ásheıhan, «Kelbet», «Jarqyn beıne» baǵdarlamalarynyń prodıýseri, aqyn Jańyl Asylbekova bekitildi.
Komıssııa músheleri fakýltet dekany bergen minezdeme, oqý úlgerimin rastaıtyn qujat, BAQ-ta jaryq kórgen materıaldary jáne S.Áshimbaevtyń ómiri men shyǵarmashylyǵy týraly referatpen tanysa kele, ál-Farabı atyndaǵy Qazaq ulttyq ýnıversıteti jýrnalıstıka fakýltetiniń І kýrs stýdenti Dastan Qastaıdyń jumysyn úzdik dep tanydy.
Saltanatty marapattaý sharasyna Saǵat Áshimbaevtyń uly, QR Parlamenti Májilisiniń depýtaty Máýlen Áshimbaev, «Qazaqstan» RTRK AQ Basqarma tóraǵasy Erlan Qarın jáne ózge de tanymal jýrnalıster qatysty.
