QazUÝ rektory Joǵary mektep Halyqaralyq ǵylym akademııasynyń altyn medalin ıelendi
ASTANA. 21 jeltoqsan. QazAqparat - Joǵary mektep Halyqaralyq ǵylym akademııasy Prezıdıýmynyń sheshimimen (JM HǴA) ál-Farabı atyndaǵy QazUÝ rektory, akademık Ǵalym Mutanov «Bilim jáne ǵylym salasyndaǵy kórnekti eńbegi úshin» atty ataýly altyn medalimen marapattaldy, dep habarlady JOO baspasóz qyzmetinen.
Joǵary marapatty ol Orta-Azııalyq aımaq boıynsha alǵashqy bolyp ıelendi. Akademııa músheleri arasynda mundaı marapatqa ıe bolǵan zamanaýı ǵalymdardyń arasynda Nobel syılyǵynyń ıegeri J.I. Alferov bar.
«Bul joǵary marapat - Ǵalym Mutanovtyń jańashyl ǵalym, birneshe ınnovatsııalyq joba avtory, iri ýnıversıtet jetekshisi retindegi eńbekteriniń úlesi. Biz shyn nıetpen ál-Farabı atyndaǵy QazUÝ-dyń rektoryn quttyqtap, aldaǵy ýaqytqa jetistikter men órleý tileımiz, - dep atady, Máskeýde ótken saltanatty marapattaý barysynda Akademııa Prezıdenti Valentın Shýkshýnov.
Akademııa óz qatarynda álemniń 47 elinen 1350 iri ári tanymal ǵalymdardyń sondaı-aq, 155 JOO men ǵylymı ortalyqtardyń basyn qosatyn halyqaralyq bedeldi uıym bolyp tabylady. Sonymen birge JM HǴA qyzmeti ártúrli elderdiń sonyń ishinde, aldymen, TMD qatysýshy-memleketteriniń bilim júıesin jaqyndastyrý men ıntegratsııalaýǵa baǵyttalǵan. Akademııa ýnıversıtettik bilimdi damytý men qalyptastyrýda jańa ıdeıalar men jańasha baǵyttardy ilgeriletýge erekshe kóńil aýdarady.
