QazUÝ rektory Kolýmbııa ýnıversıtetinde dáris oqydy

dep habarlaıdy QazAqparat QazUÝ-diń baspasóz qyzmetine silteme jasap.

Dáris taqyryby Qazaqstannyń jetekshi ulttyq ýnıversıtetiniń tájirıbesi negizinde bilim sapasynyń jahandyq ortalyǵyn qurýǵa arnalǵan. QazUÝ basshysy Qazaqstannyń joǵary bilim jáne ǵylym salasynyń reformalyq kezeńderine toqtalyp, Qazaq ulttyq ýnıversıtetiniń tájirıbesi negizinde otandyq bilim berý salasynda týyndaıtyn máselelerdiń sheshý joldarymen bólisti.

Talǵampaz, ári asa mán qoıyp daıyndalǵan tyńdarmandardyń qatarynda AQSh-tyń memlekettik departamentiniń ókilderi, Nıý-Iork qalasynyń ákimshiligi, Kolýmbııa ýnıversıtetiniń basshylary men oqytýshy-professorlary boldy. Atalmysh sharanyń ótetindigi jóninde búkilamerıkandyq akademııalyq jeli arqyly bir aı buryn Pensılvanııa, Boston, Nıý-Djersı ýnıversıtetteriniń professorlaryna málimdengen. Olar qazaqstandyq áriptesterdiń pikirlerin qoldap, qyzyǵýshylyq bildirdi. Bir saǵatqa sozylǵan pikirtalasta Qazaqstan Respýblıkasynyń bilim jáne ǵylym salasy, qoǵamdyq-saıası ahýaly, syrtqy saıasaty men Qazaqstannyń EQYU-ǵa tóraǵalyǵy sııaqty ózekti máseleler qarastyryldy. QazUÝ rektory jınalǵan qaýymnan qazaq aqyny Oljas Súleımenovtyń kóshi-qon máselesine arnalǵan Nıý-Iorkte dúnıejúzilik ǵylymı forým ótkizý ıdeıasyn qoldaýdy surady. 2009 jyldyń kúzinde O. Súleımenov Kolýmbııa ýnıversıtetinde álem halyqtarynyń kóshi-qon tarıhyna arnalǵan dáris oqyǵan bolatyn.

Sondaı-aq Baqytjan Jumaǵulov Nıý-Iorkte bilim alyp, jumys istep júrgen qazaqstandyq stýdenttermen de júzdesti. Jıynǵa qatysqan Kolýmbııa ýnıversıteti professorlarynyń biri - ataqty ǵalym, Keńes Odaǵy kezinde AQSh-tyń Tótenshe jáne Ókiletti elshi qyzmetin atqarǵan Djek Metlok qazaqstandyq áriptestermen qyzý pikirtalastar júrgizdi. QazUÝ basshylyǵy bıylǵy jyldyń mamyrynda halyqaralyq qatynastardyń teorııasy men praktıkasyn jetik zerttep meńgergen professor D. Metlokty tájirıbe almasý maqsatynda qazaqtyń jetekshi ýnıversıtetine qonaqqa shaqyrdy.

Kolýmbııa ýnıversıtetinde ótken kezdesý barysynda eki jaqty qarym-qatynasty nyǵaıtý maqsatynda júrgizilgen kelisimder negizinde aldaǵy ýaqytta arnaıy qujattamaǵa qol qoıylatyndyǵy málim boldy.