QazUÝ rektory 160 stýdentke aqysyz bilim berý sertıfıkatyn tabystady
ALMATY. 29 naýryz. QazAqparat /Ádilet Musahaev/ - Keshe QazUÝ rektory memlekettik bilim berý granty baıqaýynan ótken 160 stýdentke jáne ýnıversıtette aqyly negizde úzdik oqyp júrgen 37 stýdentke tólemaqysyna 25 paıyz jeńildik beretin sertıfıkattar tabys etti.
Ál-Farabı atyndaǵy QazUÝ-da "Qazaqstan Respýblıkasynyń Prezıdenti N.Á.Nazarbaevtyń Qazaqstan halqyna arnaǵan "Bolashaqtyń irgesin birge qalaımyz!" atty Joldaýy aıasyndaǵy ál-Farabı atyndaǵy QazUÝ-dyń áleýmettik jańarýy" taqyrybynda oqytýshylar men stýdent jastardyń aktıvi ótti.
Jıynǵa stýdentter, oqytýshylar, kýrator-edvaızerler men jastar uıymdary jáne QazUÝ kásipodaǵy, aqsaqaldar alqasy qatysty.
Shara barysynda qatysýshylar qazaqstandyq joǵary oqý oryndarynyń el modernızatsııadaǵy orny men rólin talqyldy. Sondaı-aq stýdenttik ózin-ózi basqarý uıymdarynyń jumystary, stýdent jastardyń kóshbasshy bolýy ári áleýmettik belsendiligi, stýdentterge áleýmettik turǵydan kómek kórsetý men áleýmettik ınnovatsııadaǵy QazUÝ kýrator-edvaızer mektebiniń úlesi sııaqty ózekti taqyryptar da nazarǵa alyndy.
Ýnıversıtet ustanyp otyrǵan basty baǵyt - Elbasy Joldaýynda aıtylǵandaı eki úzdik ýnıversıtet álemdik deńgeıdegi joǵarǵy oqý ornyndary qataryna kirý, bes paıyzy ınnovatsııalyq qyzmet pen ǵylymı zertteý nátıjelerin óndiriske engizý.
Aktıvte sonymen qatar, qoıylǵan mindetter men júktemelerdi atqarýǵa birden-bir negiz bolatyn qujat - Korporatıvtik mádenıet kodeksi qabyldandy. "Mundaı Kodekstiń qabyldanýy joǵary oqý oryndarynda maqsatty túrde korporatıvti ıdeologııa men korporatıvti mádenıetti damytýǵa, QazUÝ-dyń jańa ustanymy - álemdik deńgeıdegi zertteý ýnıversıtetine aınalý jolynda bıikke jeteleıdi", - deıdi QazUÝ rektory Ǵalymqaıyr Mutanov.
Sharaǵa qatysýshylar elimizdegi joǵary oqý oryndaryna arnaıy úndeý qabyldap, 3 sáýirde ótetin Qazaqstan Respýblıkasy Prezıdentiniń kezekten tys saılaýyna belsendi qatysyp, Qazaqstannyń áleýmettik jańǵyrýyna súbeli úles qosýǵa shaqyrdy.
