QazUÝ postdoktorantýra baǵdarlamasyn ashty
Bul mańyzdy qadam ýnıversıtetti ozyq álemdik deńgeıdegi zertteý ýnıversıtetterine aınaldyrýǵa jáne álemdik ǵylymı-bilim berý qoǵamdastyǵyndaǵy qazaqstandyq ǵylymnyń básekege qabilettiligin odan ári arttyrýǵa baǵyttalǵan.
Dúnıejúzilik tájirıbede potsdoktorantýra ınstıtýty joǵary bilikti ǵylymı kadrlardy daıarlaýdyń tıimdi nysandarynyń biri, ári ǵylymnyń negizgi qozǵaltqyshy bolyp tabylady. QazUÝ-dyń joǵary halyqaralyq standarttarǵa sáıkes keletin postdoktorantýra baǵdarlamasy eń aldymen ǵylymı dárejesi bar jas mamandardyń kásibı biliktiligin arttyryp, olardyń júrgizgen derbes ǵylymı zertteýlerin tájirıbelik-konstrýktorlyq ázirlemeler aıasynda jáne joǵary reıtıngili ǵylymı basylymdarynda jarııalaý arqyly ózektiligin arttyrý múmkindigin beredi.
Qazaqstandaǵy postdoktorantýra baǵdarlamasyn alǵash ashqan joǵary oqý orny retinde QazUÝ talantty jas ǵalymdardy qoldaý úrdisin aıqyndap, ýnıversıtettiń ındýstrııalyq-ınnovatsııalyq jáne bilimge negizdelgen ekonomıkanyń ortalyǵy retinde qalyptasýynyń kelesi kezeńin júzege asyrýda.
Bul jańashyldyq Qazaqstan úshin qajetti ǵylymı kadrlardy daıarlaýǵa qatysty mańyzdy máselelerdi sheshýge, jastardy «jylystaýdan» «tartýǵa» jáne «ǵulamalardyń aınalymyna» jumyldyrýǵa múmkindik beredi. Baǵdarlama, sondaı-aq, QazUÝ-dyń ǵylymı-zertteý jáne ınnovatsııalyq qyzmetine tek qazakstandyq qana emes, sonymen birge búkil álemniń ǵalymdaryn tartýǵa septigin tıgizetin bolady jáne de otandyq ǵylymnyń álemdik ǵylymı-bilim berý keńistigine ary qaraı ıntegratsııalanýyna múmkindik beredi.
Qazirgi ýaqytta ýnıversıtet josparly túrde alǵa jyljyp, bedeldi álemdik reıtıngilerdegi óz pozıtsııalaryn nyǵaıtýda, sondaı-aq zamanaýı ǵylymı-ınnovatsııalyq ınfraqurylymy bar iri zııatkerlik korporatsııa bolyp tabylady.
