QazUÝ pedagog mamandardy daıarlamaıtyn boldy
ALMATY.QazAqparat - Almatydaǵy iri joǵarǵy oqý orny keıbir pánder boıynsha pedagogıkalyq mamandyqtar qataryn qysqartty. Bul týraly qalalyq óńirlik kommýnıkatsııalar qyzmetinde Ál-Farabı atyndaǵy QazUÝ-dyń rektory Ǵalymqaıyr Mutanov málimdedi, dep habarlaıdy QazAqparat tilshisi.
«Sońǵy kezderde bul máseleni jan-jaqty talqyladyq. Aqyrynda pedagogıkalyq mamandyqtardan bas tartýdy jón sanadyq. Bul úshin respýblıkanyń barlyq aımaǵynda arnaıy oqý oryndary bar. Abaı atyndaǵy Qazaq Ulttyq pedagogıkalyq ýnıversıteti muǵalimderdi daıarlaıdy. Bizdiń baǵyt - ǵylymı mamandyqtar. Alaıda stýdentter «Bizdiń armanymyz - QazUÝ-de bilim alý» dep urandatyp qoıar emes. Kóbin keri qaıtardyq, kónbegenderin alyp qalýǵa týra keldi. Keler jyly múldem qabyldamaımyz»,- dedi Ǵ. Mutanov.
Bıyl pedagogıkaldyq mamandyqtarǵa 160 talapker ótinish bildirgen. Biraq olarǵa jataqhana berilmeıdi. Tek áleýmettik jaǵdaıy tómen stýdentter ǵana jatyn orynmen qamtamasyz etilmek.
Sondaı-aq QazUÝ rektory bıyl IT salasyndaǵy mamandyqtarǵa suranys artqanyn atap ótti.
Stýdentterdiń basym bóligi «Quqyqtaný», «Ekonomıka» «Halyqaralyq qatynastar» mamandyǵyn tańdaıdy. Sondaı- aq ınjenerlik salany ıgergisi keletinderi de joq emes. IT fakýltetine qyzyǵýshylyq tanytýshylardyń kóbeıgengendigin de atap ótpeske bolmas. Buryn bul mamandyq «Mehanıka jáne matematıka» sheńberinde qalyp qoıatyn. Bıyldan bastap jańa fakýltet ashyp, «e-commerce», «Esepteý lıngvıstıkasy», «Big Data», «Jasandy ıntellekt» mamandyqtaryn uıymdastyrdyq. Qazirgi stýdentter bolashaq aqparattyq tehnologııalar qolynda ekenin biledi. Kóptegen elder tsıfrlyq formatqa kóshýde. Bul mamandar Qazaqstandy joǵarǵy deńgeıge kóteretinine senimdimin»,-dedi ol.
Ál-Farabı atyndaǵy Qazaq ulttyq ýnıversıtetinde 10 myńǵa jýyq stýdent bilim alady. Olardyń 6 myńnan astamy memlekettik grant esebinen oqıdy. 800 shákirt «Altyn belgi» ıegeri.
