QazUÝ ózine qol salmaq bolǵan stýdent qyzdyń jaǵdaıyna qatysty túsinik berdi

ALMATY.KAZINFORM — ál-Farabı atyndaǵy Qazaq ulttyq ýnıversıteti ózin jaraqattaǵan qyz týraly túsinik berdi.

QazUÝ ózine qol salmaq bolǵan stýdent qyzdyń jaǵdaıyna qatysty túsinik berdi
Foto: ál-Farabı atyndaǵy QazUÝ

Ýnıversıtettiń málimetinshe, stýdent qyz jedel járdem shaqyrǵan.

— Medıtsınalyq qupııany saqtaý jáne zańnama talaptaryna sáıkes aýrýhana bizge naýqastyń jaǵdaıy týraly tolyq aqparat bergen joq. Biz stýdent qyzdyń ata-anasymen tyǵyz baılanystamyz. Olardyń aıtýynsha, qazirgi ýaqytta onyń jaǵdaıy turaqty, — dep habarlady QazUÝ baspasóz qyzmeti.

Sondaı-aq ýnıversıtet ókilderi qazir oqıǵanyń barlyq mán-jaıyn quzyrly organdar anyqtap jatqanyn atap ótti.

Buǵan deıin Almatydaǵy JOO-da stýdent qyz ózine dene jaraqatyn salǵany aıtyldy. Alaıda bul kezde QazUÝ muny jalǵan aqparat degen edi.

Eske salaıyq, buǵan deıin de QazUÝ-da stýdenttiń ózine qol salýyna qatysty qylmystyq is qozǵalǵan edi.

Ǵylym jáne joǵary bilim mınıstri Saıasat Nurbek ál-Farabı atyndaǵy QazUÝ stýdentiniń qaıtys bolýyna qatysty pikir bildirip, ýnıversıtet basshylyǵy marqumnyń otbasyna qajetti kómek kórsetkenin málimdedi.

Sodan keıin Almatyda taǵy da QazUÝ stýdenti qaza tapty.

Kúdikti ustalyp, prorektor men dekan jumysynan ketti.

Eki jaıttan keıin QazUÝ-ǵa mınıstrliktiń arnaıy toby baratyny belgili boldy.