QazUÝ - Ortalyq Azııa JOO-lary arasyndaǵy eń úzdigi

ASTANA. QazAqparat - Brıtandyq «Times Higher Education» (THE) agenttiginiń zertteý nátıjesi boıynsha ál-Farabı atyndaǵy QazUÝ Ortalyq Azııa ýnıversıtetteri arasynda birinshi ári jalǵyz bolyp «THE World University Rankings-2019» reıtinginde álemniń úzdik JOO-larynyń 801-1000 tobyna endi. Jalpy bul reıtıng tiziminde 86 elden 1250 ýnıversıtet bar, dep habarlaıdy QazAqparat ýnıversıtettiń baspasóz qyzmetine silteme jasap.   

TNE reıtıngi 2010 jyly«Global Institutional Profiles Project» jahandyq jobasy aıasynda «Times Higher Education» jáne «Thomson Reuters» birlese jasaǵan, ýnıversıtetterdiń barynsha yqpaldy ǵalamdyq reıtıngisi sanalady.

TNE reıtınginiń aıryqsha ereksheligi - baǵalaý krıterııleriniń basym bóliginiń ýnıversıtettegi ǵylymı-zertteý jáne ınnovatsııalyq qyzmetterge baǵyttalýynda. Barynsha tolyq ári úılesimdi salystyrýmen qamtý úshin: zertteý jáne bilim berý qyzmeti, bilim transferti jáne ınnovatsııaǵa úles, ınternatsıonaldandyrý, ǵalymdardyń ǵylymı maqalalarynyń jarııalanýy, halyqaralyq qarym-qatynas sııaqty bes baǵyt boıynsha 13 ındıkator qoldanylady. 

AQSh jáne Ulybrıtanııa ýnıversıtetteri TNE reıtınginde dástúrli túrde kósh bastap keledi. QazUÝ halyqaralyq reıtıngilerde serpindi alǵa basýda, buǵan bilim ordasynyń álemdik deńgeıdegi zertteý ýnıversıtetine tabysty transformatsııalanýy óz septigin tıgizýde. Elimizdegi jetekshi ýnıversıtettiń jańa jetistikteri joǵary oqý ornynyń jáne jahandyq ǵylym-bilim berý keńistigindegi Qazaqstannyń joǵary bilim berý júıesiniń joǵary básekege qabilettiligin ańǵartady.

Aıta ketý kerek, 2019 jyldyń qyrkúıek aıynda ál-Farabı atyndaǵy QazUÝ «QS World University Ranking» Halyqaralyq reıtınginde 220-shy oryndy ıelengen, «Great Value Colleges» halyqalalyq uıymynyń málimetine sáıkes álemniń tehnologııalyq turǵyda eń damyǵan top-50 ýnıversıtetteri qatarynda, sondaı-aq «UI Green Metric Ranking of World Universities» reıtınginde álemniń top-200 «jasyl» ýnıversıtetterine kiredi.