QazUÝ Naýryz meıramyn toılady
ALMATY. 11 sáýir. QazAqparat /Ádilet Musahaev/ - Keshe ál-Farabı atyndaǵy Qazaq ulttyq ýnıversıteti Ó.Joldasbekov atyndaǵy Stýdentter saraıynyń alańynda «Qosh keldiń, áz-Naýryz!» meıramyn toılady. Kontserttik baǵdarlamany dástúrli túrde QazUÝ-dyń «Farabı sazy» ult aspaptar orkestri Túrkeshtiń «Kóńil ashar» kúıimen ashty.
Merekelik sharada Almaty qalasy ákiminiń orynbasary Serik Seıdýmanov, QR UǴA prezıdenti, akademık Murat Jurynov, akademık Tólegen Qojamqulov jáne qazaq estradasynyń ánshileri arnaıy qonaq boldy.
«Naýryz meıramy - kún men tún teńeletin, jaqsylyqqa jol bastaıtyn tabıǵı qubylys. Beıbitshiliktiń, birlik pen tirliktiń meıramy. Jaqynda ǵana bir aýyzdan QR Prezıdentin saıladyq. Bul jańa bastamanyń kezeńi dep oılaımyn. Bolashaǵymyz jarqyn bolatyndyǵyna senimimiz mol. Elbasy órkendeýdiń, jańǵyrýdyń nyshandaryn alǵa tartyp otyr. Ulttyq zertteý ortalyǵy retinde QazUÝ óz kezeginde osy talaptardy oryndaýǵa atsalysyp keledi», - deıdi rektor Ǵalymqaıyr Mutanov merekelik sharanyń ashylý barysynda.
Ulystyń uly kúnin toılaýǵa búkil ýnıversıtet qyzmetkerleri men 3000-nan astam stýdent qatysty. Kıiz úıler tigilip, toıdyń basty dámi «Naýryz kóje» taratyldy. Úlken-kishi, kári-jas qosylyp stýdentter daıyndaǵan kontserttik baǵdarlamany tamashalasa, qazaqtyń ulttyq kıimin kıgen jastar altybaqan teýip án aıtty. Ýnıversıtettiń talantty jastary bar ónerlerin ortaǵa salyp, qazaq halqynyń atadan balaǵa mura bolyp qalǵan salt-dástúrin eske túsirdi.
Sonymen qatar 9 sáýir kúni merekelik shara aıasynda ýnıversıtet kampýsynda "Naýryz - jańarý ıdeıasy" atty tazalyq jumystary júrgizildi. Stýdentter men oqytýshylar, QazUÝ qyzmetkerleri birigip ýnıversıtet aýmaǵyn tazalady. «Eń taza aımaq» baıqaýy boıynsha júldeli birinshi oryndy fılosofııa jáne saıasattaný fakýlteti men bıologııa fakýlteti jeńip alǵan. Ekinshi oryndy halyqaralyq qatynastar men jýrnalıstıka fakýltetteri ıemdense, úshinshi oryndy tarıh jáne geografııa fakýltetteri bólisken.
Saltanatty sharadan keıin jıylǵan qaýym aq shańqan kıiz úıde daıyndalǵan naýryz dastarhanynan dám tatty. Qazaq halqynyń dástúrli taǵamdarynan baýyrsaq, et, qazy-qarta, al sýsyndarynan qymyz, shubat, shaı qoıyldy. Aǵa býyn ókilderi jastarǵa batalaryn berip, shejireden biraz syr taratty.
Merekelik baǵdarlama jastarǵa arnalǵan bı keshimen jalǵasyp, 3D formatyndaǵy beınesıýjet kórsetilip, Naýryz meıramy arnaıy otshashýmen aıaqtaldy.
