QazUÝ Koreıanyń eń bedeldi eki ýnıversıtetimen strategııalyq seriktestik ornatty
ASTANA. KAZINFORM — Qazaqstan Respýblıkasynyń Prezıdenti Qasym-Jomart Toqaevtyń Koreıa Respýblıkasyna memlekettik sapary aıasynda ál-Farabı atyndaǵy Qazaq ulttyq ýnıversıteti Koreıanyń jetekshi joǵary oqý oryndarymen strategııalyq yntymaqtastyq týraly memorandýmdarǵa qol qoıdy. Bul týraly Ǵylym jáne joǵary bilim mınıstrligi málim etti.
Kelisimder «Koreıa — Ortalyq Azııa» sammıti aıasynda jasaldy. Atap aıtqanda, QazUÝ Kore ýnıversıteti jáne Ense ýnıversıtetimen yntymaqtastyqty resmı túrde bekitti.
Resmı rásimge QR Ǵylym jáne joǵary bilim mınıstri Saıasat Nurbek, QazUÝ Basqarma tóraǵasynyń orynbasary — birinshi prorektordyń mindetin atqarýshy Samǵat Ermekbaev, sondaı-aq Kore ýnıversıteti men Ense ýnıversıtetiniń basshylyǵy qatysty.
QazUÝ men Ense ýnıversıtetiniń yntymaqtastyǵy 2011 jyldan beri júıeli túrde damyp keledi. Jańa memorandým akademııalyq baılanystardy odan ári nyǵaıtyp, stýdentter men oqytýshylar almasýyn, akademııalyq utqyrlyqty jáne birlesken bilim berý bastamalaryn keńeıtýge múmkindik beredi. Kore ýnıversıtetimen jasalǵan kelisim birlesken ǵylymı zertteýlerdi, aýqymdy akademııalyq is-sharalar men irgeli bilim berý bastamalaryn damytýdy kózdeıdi.
— Jalpy eki memorandým QazUÝ men Koreıanyń jetekshi joǵary oqý oryndary arasyndaǵy yntymaqtastyqty jekelegen akademııalyq almasýlardan keshendi strategııalyq seriktestik deńgeıine kóterýge baǵyttalǵan. Sonymen qatar QazUÝ stýdentteri úshin Kore ýnıversıteti men Ense ýnıversıtetinde ǵylymı jáne óndiristik taǵylymdamadan ótýge, kásibı quzyretterin jetildirýge jáne halyqaralyq akademııalyq ortada tájirıbe jınaqtaýǵa jańa múmkindikter ashylady, — delingen habarlamada.
Aıta keteıik, Kore ýnıversıteti men Ense ýnıversıteti Koreıa Respýblıkasynyń eń bedeldi joǵary oqý oryndaryn biriktiretin SKY akademııalyq tobynyń quramyna kiredi. Eki ýnıversıtet te halyqaralyq reıtıngterde joǵary kórsetkishterge ıe jáne Koreıanyń bilim berý men ǵylymı-zertteý júıesinde jetekshi oryn alady.
Eske sala keteıik, Qazaqstan Respýblıkasy men Koreıa Respýblıkasy syrtqy ister mınıstrleri bolashaqqa baǵdarlanǵan qazaq-koreı qarym-qatynasyn jan-jaqty strategııalyq seriktestik deńgeıine deıin kóterý týraly verbaldi notalar almasty. Qazaq-koreı kelisimderi energetıka, ǵylym, jumyspen qamtý jáne týrızm salasyn qamtydy.
