QazUÝ granttar sany boıynsha kóshbasshy atandy
ASTANA. QazAqparat - Ál-Farabı atyndaǵy QazUÝ elimizdegi bólingen oqý granttarynyń sany boıynsha absalıýtti kóshbasshy atandy, dep habarlaıdy atalǵan JOO-nyń baspasóz qyzmeti.
Bıyl 6,6 myńnan astam mekteptiń úzdik túlekteri QazUÝ-dy tańdap memlekettik bilim grantyna ıe bolǵan, olardyń edáýir bóligi «Altyn belgi» ıegerleri, halyqaralyq jáne respýblıkalyq olımpıadalardyń jeńimpazdary.
Bul qazaqstandyq joǵary bilim berý tarıhyndaǵy rekorttyq kórsetkish. QazUÝ granttar sany boıynsha basqa joǵary oqý oryndarynan oq boıy ozyq tur. Sanaly ári úlken maqsatqa toly talapkerdiń sapaly bilim alýy úshin elimizdegi jetekshi oqý ornyn tańdaýy atalmysh ýnıversıtetke degen joǵary senimdi bildiredi.
Eń úlken baıqaý radıotehnıka, elektronıka jáne telekommýnıkatsııalar, aqparattyq júıeler, avtomattandyrý jáne basqarý, týrızm, hımııalyq tehnologııalar syndy mamandyqtar boıynsha júrgizildi. Halyqaralyq qatynastar jáne quqyq, quqyqtaný, qarjy, esep jáne aýdıt, ekonomıka talapkerler arasynda tanymaldylyq qalpynda qalyp otyr. Magıstratýra men doktorantýraǵa túsýge de baıqaý burynǵysynsha óte joǵary. Jekelegen mamandyqtar boıynsha úmitkerler sany bir orynǵa 15-20-dan asa adamnan keledi.
QazUÝ álemdegi úzdik top-220 JOO-nyń qatarynda ári bilim, ǵylym jáne ınnovatsııanyń jetekshi ortalyǵy bolyp tabylady. Ýnıversıtette álemniń áıgili joǵary oqý oryndarymen seriktese otyryp qosdıplom bilim baǵdarlamalary belsendi engizilýde, oqytý aǵylshyn tilinde júzege asyp, kóptegen jańa mamandyq ashylýda.
